Efterskoli ataasiinnaq amigarpoq
Qasigiannguani efterskolitaaq suliluunniit aallartinngitsoq aappernissaa eqqarsaataalereerpoq.
Qasigiannguani efterskolissaq sap.akunnerup siuliani napparnersiorneqarpoq, qaammaterpassuunngitsullu qaangiupata atuartussat 90-it tikilluaqquneqarsinnaanngussapput. Massakkulli 52-it utaqqisutut allassimalereerput.
– Tamatuma ersersippaa efterskolimik allamik pisariaqartitsisoqartoq, KIIIN-imi ilinniartitaanermi nakkutilliisoq Kaali Olsen oqarpoq.
Sapaatit akunnerani matumani utaqqiisaasumik efterskoliusimasut pisortaat Nuummi naapisimaassapput naalakkersuisoqarfimmi atorfillit peqatigalugit isummersorfigissallugu efterskolit ingerlanerat qanoq issimanersoq, siunissamilu efterskolit tungaatigut qanoq iliortoqarsinnaanersoq. Isummersornissami aamma ilaavoq efterskolimik allamik aappaagu tapertaqartariaqarnersoq.
– Taamaassapat aningaasaliissutit pioreersut iluanni taanna aningaasalerneqartussaassaaq, Kaali Olsen erseqqissaavoq.
Aalajangertoqassappat efterskoli aapperneqassasoq, taava Kangerlussuaq periarfissaavoq tigoriaannaq.
– Illut namminersornerusunit pigineqarput, atoqqeriaannaallutillu, Kaali Olsen oqarpoq.
Efterskoli aasamut aapperneqassanersoq upernaap ingerlanerai aalajangiiffigineqassasoq naatsorsuutigineqarpoq.
Sermitsiaq nr. 13 atuaruk...