Narsap juullimi tunissutai tusarniaavigineqarput
Inatsisitigut tunngavissaqarpa Narsap decembarimi kommunip karsianit 3,2 millioner koruunit atormagit?
Tunuarsimaanngilluinnarput taamanikkut Narsap Kommuneani kommunalbestyrelsip 2008-mi decembarip 12-ianni kingullermik ataatsimiinnermini kommunip karsia ilanngartoramikku.
Tassami assammikkut sajunngilluinnarlutik akuersissutigaat kommunip allaffiani sulisut akissarsiamik saniatigut 4.000 koruuninik tunineqassasut, aammalu kommunimi pensionisiallit 500 koruuninik tunineqarlutik kiisalu kommunip biiiliutai marlussunnik ilallugit.
Aningaasat tamakkununnga atorneqartut katillugit 3,2 millioner koruuniupput. Aningaasat kommunersuarmut nutaamut, Kommune Kujallermut, 2008/2009-mi ukiut nikinneranni ingerlateqqinneqartussaagaluit.
Nunap iluani pissutsinut allaffiup Sermitsiamut paasissutissiissutigaa pisimasup ingerlarnganut tamarmut iliuuseqarnermut allakkiaq naammassingajalerlugu, taannalu marsip naalernerani Kommune Kujallermut nassiunneqassasoq tusarniaavigineqartutut.
Tusarniaanerup akissutissaanut sapaatip akunneri marlussuit ilanngunneqassapput, taakkualu ingerlareerpata Nakkutilliisoqarfiup suliassaq suliarisinnaalissavaa.
Narsap Kommuneani borgmesteriugallartoq Josef Petersen, Atassut, decembarimi KNR-imut oqarpoq aningaasat tunniunneqartut qujassutitut tunissutaasut, pissutigalugu sulisut kommunersuassamut ulapillutik sulisimammata.