Tuusi: Nunarsuarmi nukissiornermik atuineq nakkaannarfiginagu
Narsami peqatigiiffiup nipaa nunarsuup qaqqaasigut akisuasoq tusaaneqarli, tamakkunatigoorlugu aningaasarsiornermik pinngitsuuisinnaajunnaaqqasut aatsitassarsioqatigiiffiillu allaffiinit tusaaneqarsinnaalersillugu, IA-p siulittaasorisimasaa Narsami urani pillugu ataatsimeersuarnermi taama oqarpoq.
Josef Motzfeldt Kuannersuarmi uranimik piiaasinnaanermut tunngatillugu tallimanngornermi oqallinnermi sakkortuumik oqalugiarpoq.
- Piorsaanerup aningaasannanniartartut oorinoorfiannit aatsitassarsiutileqatigiillu aningaasaateqariinit aqunneqarneranik piusuusaartitsilluni eqqarsarnitsinnit kaanngarniarta. Tassami nunarsuarmi naalafaaffiit pissaanilissuit pisuussutinik nukissiornermut atorsinnaasunik ataavartumik pissarsiornerannut nakkaannarnissamut tunngavissaqanngilagut, Josef Motzfeldt oqarpoq, taamalu taamaalilluni erseqqissarpaa uranimik piiaanissaq nammineq inuttut tapersersorsinnaanngikkini.
- Aatsitassarsiornerup qaqileqqinneqarnissaanut patsisigineqartut ilagaat ujaqqat uranitallit suliareqqinneqarnissaat Kalaallit Nunaannut ajornartorsiutaanngitsoq, ujaqqat qallorlugit aserorteqqissaakkat aallarullugit nunaninalani suliarineqarsinnaassammata.
- Taava apererusuppunga: Nunarsuarmioqatigiinnut ilaavugut? Imaluunniit tapersersuisut isumaqarnerlutik immitsinnut inuiattut takornartatut toqqortartut isiginiarnersugut, nunarsuarmut ataatsimilluunniit akisussaaffeqanngitsut?
Josef Motzfeldtip parteeqataata, kommunalbestyrelsimut inatsisartunullu ilaasortap Aqqaluaq Egedep tupigusuutigaa Kommuni Kujallermi aqutsisut naalakkersuisullu inunnut sunniutigisinnaasaata misissuiffigineqarnerata ingerlasup inernera utaqqeqqaarnagu uranimik piiaanissaq tapersersormassuk.
- Maani Narsami misigisimavugut suliffissat aningaasaqarnerlu uagutsinnit inunnit uagullu peqqissutsitsinnit pingaarnerutinneqartut, Aqqaluaq Egede oqarpoq.