Narsami urani pillugu ataatsimiittut amerlapput
Kommune Kujallermi borgmesteri Simon Simonsen Kuannersuarmit uranik piiaanissaq isumalluarnartoqartippaa. Tamanna suliffissanik pilersitsissaaq, isumaqarppoq.
Kuannersuit Kalaallit Nunaatalu aatsitassanik piiaaffiusinnaaneranut - aamma uranimik - periarfissai Narsami tallimanngornerup tungaanut pisortaniit arlalinnit oqalugiarfigineqartussami oqaluuserineqarpoq.
Kommune Kujallermi borgmesterip Simon Simonsenip ataatsimeersuarneq innuttaasut 71-it peqataaffigisaat ippassaq unnukkut ammarpaa. Simon ilaatigut oqarpoq, nammineq inuttut uranimik piiaanissaq tapersersorini, kisianni killilersukkamik:
- Tamanna peqqissaarluinnartumik mianersorluinnartumillu ingerlanneqartariaqarpoq, pinngortitaq inuillu sianigineqassammata.Taamalu kommunimi suliffissaaleqisut 500-it eqqaallugit inuussutissarsiorfissanik suliffissanillu nutaanik nassaarniartariaqarpugut.
Ullumikkut namminersornerusuni pisortaasimasoq Kaj Kleist Agenda 21 pillugu oqalugiassaaq, ICC Kalaallit Nunaata præsidentiata Aqqaluk Lyngep aamma tuttuutillip Stefan Magnussonip aatsitassanik suliffissuaqarneq tuttuuteqarnerlu oqaluttuarissavaat. Saqqummiisaqattaarnerit tamarmik kikkinnut soqutiginnittunut tamanut ammasoq aqagu tallimanngorpat oqallitsitsinermik naggaserneqassaaq.