Avalak: Akisussaaffik nammineq tiguarput
Ilinniagaqartut Kalaallit Nunaannut angerlartinnatik inissat, peqqinnissaqarfiup, atuarfiit ulluuneranilu paaqqinnittarfiit aaqqiivigineqareersimanissaat piumasaraat.
- Politikerit oqalugiaataat nalunngilagut, kisianni iliuuseqartoqanngilaq, kalaallit ilinniagaqartut kattuffianni Avalak-mi siulittaasoq Aqqaluk Petersen oqarpoq. Oqaaseqaat ilinniagaqartut ulluata naggataarnerani saqqummiunneqarpoq. Kalaallit savalimmiormiullu ilinniagaqartut ullumi folketingimi ulloqartinneqarput.
Ukioq manna qulequtarineqarpoq ”Qaqqat qaaqqusigaangata”. Taanna qulequtaralugu namminersortumik inussutissarsiortut politikerillu ilinniagaqartut naammassippata angerlarnissaat ajunngitsuusoq qularunnaarsinniarpaat.
Kisianni ajornartorsiutit kalaalllit inuiaqatigiit suli aaqqissimanngisaat pillugit aammaarlutik saqqummiussivigineqaqqipput. Ajornartorsiutit kalaallit ilinniagaqartut naapertorlugit Kalaallit Nunaannu angerlarnissaq eqqarsaatigineqarsinnaalertinnagu aaqqeqqaartariaqartut.
- Inuusuttut ilinniarluarsimasut angerlarnissaannik kissaateqarluni suliniarnerit iluatsissappata inissat, peqqinnissaqarfimmi pissutsit, atuarfiit ulluuneranilu paaqqinnittarfiit aaqqeqqaartariaqarput, Aqqaluk Petersen Sermitsiamut oqarpoq.
Taamaattumik politikerit ikiorniarlugit Avalak iliuuseqarpoq.
- ajornartorsiutit uagutsinnut tunngasut pineqarmata pingasunik aaqqissutissatut siunersuutissaqarpugut. Taava politikerit namminneq aalajangissavaat. Tassami naviiginnarnagit maanna akisussaaffimmik tigusivugut, Avalakip siulittaasua oqarpoq.
Taassuma neriuutigaa, nipit nutaat politikerit eqqortumik aqqutissiuutissagaat.
Tamanna sioqqullugu kalaallit danskillu politikeriisa Kalaallit Nunaanni Savalimmiunilu namminersortumik inussutissarsiortut aallartitaasa ilinniagaqareerluni angerlarnerup nuannersuuneranik suliniuteqarlutik ingerrlatsisimapput.
- Allanut sanilliullugit Ilinniagaqarsimasuulluni akissutissarsinissat sukkanerullutillu suliassat soqutiginarnerupput, Nukissiorfiit pisortaat Svend Hardenberg oqarpoq.
Aamma Kommuneqarfik Sermersuup borgmesteria Asii Chemnitz toqqaannartumik kajumissaaruteqarpoq.
- Atorfissaqartippassi, aamma innuttaasut isumalluartuullutillu kommunerujussuaq neriuuteqarfigaat.