Danmarkimut timmisartuussinissaq arfininngornermut kinguartinneqarpoq
Kalaallit Nunaata kitaani anorersuarnera isikkivilunneralu peqqutigalugit, Air Greenlandip Airbus 330-200-mik Norsamik Kangerlussuarmiit Københavnimut timmisartuussinissani aqagu arfininngornermi pisussanngorlugu kinguartippaa, nal. 09.15 aallassalluni.
Annonse
Tallimanngornermi ullup qeqqata siorna Nuup eqqaani sakkortuumik anorersuarpoq, timmisartuussisoqarsinnaananilu. Silarluk avannamut ingerlaarpoq, timmisartuussinissalu taamaasilluni aamma ajoquserlugit. Ilaasullu ullumi Københavnimiit tikittussaagaluit ilaat, aqagu arfininngornermi aatsaat ornitaminnut apuussinnaassaput.
Nuummit Sisimiuniillu Danmarkiliartussat Airbus-imut angumeqqunniarlugit aqagu arfinginngornermi ullaralaakkut Kangerlussualiaanneqassapput, Nuummiillu aallartussaq siulleq nalunaaqutaq tallimanut aallassaaq.