TELE-POST ikioqquvoq
TELE-POST-ip telefonbogip tullia suliarileruttorpaa, taannalu sapinngisamik eqqortunik allassimasassaaq. Taamaattumik atuisartut kajumissaarneqarput namminerminnut paasissutissat eqqortumik allanneqarsimanersut misissoqqullugu.
Telefonbogiliorneq suliaq annertoorujussuuvoq, TELE-llu nukippassuit atortarai paasissutissat katersornerannut, atuisartuni naammagisimaarinnitsikkumallugit.
– Kissaatigaarput telefonbogi atuisartunit tamanit atorneqarsinnaassasoq, taamaattumillu atuisartutta ikiuunnissaat atorfissaqartipparput, telefonbogimik ataqatigiissaarisoq Mai-Britt Villadsen oqarpoq.
Taamaattumik assersuutigalugu nuunnermi eqqaamaneqassaaq TELE-POST-ip telefonbogimi allannguutissanik tamanik paasissutissinnissaa. TELE-POST-ip paasissutissat taamaallaat allanngortissinnaavai atuisartumit namminermit paasissutissanik tunineqaruni, taamaattumik nuunnermi nalunaaruteqarnissaq eqqaamaneqassaaq, taamaasilluni assersuutigalugu illumi aalajangersimasumik telefoni, internetti telefonilu angallattagaq nooqataaniassammata.
– Taamaattumik TELE-POST-imit atuisartuvut kajumissaarusuppavut 2008/2009-mut telefonbogi misissoqqullugu, imaluunniit Paasissutissat misissoqqullugit uani www.tele.gl. Atuisartumut paasissutissat eqqunngippata amigaateqarlutilluunniit, allanngortinneqarnissaat qinnutigineqarsinnaavoq qupperneq nittartagaq atorlugu imaluunniit TELE Servicebureau-mut 91 12 55-imut sianerluni, Mai-Britt Villadsen oqarpoq.
Atuisartut telefonbogimi naqitami paasissutissanik nutarterinissaannut killissaritinneqarpoq februarip 23-iat, ulloq taanna TELE-POST paasissutissat databasemit annisissammagit, telefonbogimut tullermut atugassat.
TELE-POST-ip naatsorsuutigaa telefonbogi nutaaq 2009-mi aasap ingerlanerani saqqummerumaartoq.