Peqqissutsimut ataatsimiititaliaq iluarisimaarinnippoq
Ilaqutariinnermut Peqqissutsimullu Naalakersuisumik ataatsimeeqatiginninneq kingunerlunngilaq.
Ullumi nal. 15:30 Peqqissutsimut Ataatsimiititaliap ataatsimigiiaqqusineranut aggerpoq, Dronning Ingridip Napparsimavissuani pissutsit pillugit nassuiaassiartorluni, allaffissornermi pisortaq Ann B. Kjledsen ingiaqatigalugu.
Ataatsimiinnerup nalunaaquttap akunneranik ataatsimik sivisussullip kinngorna Naja Petersen sermitsiaq.gl-imut oqarpoq:
– Ataatsimiititaliap nassuiaassineq ajorinngilaat, tamannalu pitsaasumik ingerlanneqarpoq. Ataatsimiititaliamut oqaluttuaraara naalakkersuisoqarfimmit aningaasaqarnermut ataatsimiititaliamut immikkut aningaasaqartoqarnissaanik qinnuteqaat, maannakkut taartaagallartussanik atorfissaqartitsinermut matussusiisussaq, nassiussimallutigu.
Ataatsimiititaliami ilaasortat maannakkorpiaq peqqissaasunik amigaateqarneq qanoq iluarsineqassanersoq pillugu siunnersuutissaqanngillat, immikkut aningaasalissuteqartoqarnissaannik qinnuteqaat tapersersorlugu oqariartuutaat eqqaassanngikkaanni.
Juliane Henningsenip inassutigaa nunat avannarliit avataanniit peqqissaasunik pissarsiornissaq kiisalu Aleqa Hammondip pingaartippaa tusagassiutit assigiinngitsut atorlugit sulisussarsiornissaq.