Attartortumiit piginnittuunermut tunngasoq demokratiimik atornerluineruvoq
Politikerit suliami attartortumiit piginnittuunermut tunngasumi imminnut ilanngutitissimasut imaassinnaavoq pinerlunnermut inatsisinik unioqqutitsinngitsut. Kisianni qularutissaanngitsumik demokratiip tunngaviinut unioqqutitsisimapput, immikkut ilisimasalik isumaqarpoq.
Demokratiip qanoq atorneqartarneranik atornerlunerugaluarpoq, taamak Pia Vendel Ankersen Namminersornerusut pisortanut illunik tuniniaanerat pillugu knr.gl-imut oqarpoq.
Taassuma oqaatigaa inatsit Naalakkersuisut malissimasaat inuit nammineq iluminniittut kisiisa salliutinniarlugit suliaasoq:
- Inuit inatsisiliortuusut inatsit imatut ilusilersugaq suliarisimavaat imminnut iluaqusertussanngorlutik. Taava kingornagut inatsit malissimagaanni, taava ullumikkut oqarsinnaalerpugut pinerluttoqarsimanngitsoq. Aap, taamaappoq, taamaappoq inatsisip malinneqarsimanera pissutigalugu. Kisianni inatsit taanna aallaqqaammulli suliarineqarsimavoq inuit inatsimmik inatsisiliortut salliutinniarneqarmata, Pia oqarpoq.
Pia Vendel Ankersenip qularutiginngilaa Naalakkersuisut pissusilersornermi tunngaviit toqqammaviusut sakkortuumik unioqqutissimagaat.
- Qinigaagaanni namminerlu soqutigisat kisiisalu aallunniarlugit taava tamanna demokratiip atorneqartarnerani toqqammaviinik atornerluineruvoq, Pia oqarpoq.