Asfalti nutaaq koruunerpassuarnik sipaarutaasimmaavoq
Kalaallit Nunaanni aqquserngit nutaamik asfaltilersorneqartarneri ukiut tamaasa millionilikkaanik akeqartarpoq. Minnerunngitsumik Nuummi aqquserngit ukiut tamaasa nutaamik qallersorneqartartumi, kisianni siunissamik immaqa taamaattuaannarunnaassaaq.
Center for Arktisk Teknologi-mi ilinniartoq Nivi Geisler asfaltimik nutaamik atortussiamik polyme-nik akulimmik misileraanermini isumalluarnartunik angusaqarsimavoq. Asfaltip nutaap aqqusinerni ullumikkut ajornartorsiutaasartut iluaqusersinnaavai, knr.gl allappoq.
- Kalaallit Nunaanni asfalti aqitsuararsuaq atorneqartarpoq. Aasaanerani aattarpoq assakaasullu illininittarlutik, ukiuunerani qerattartarpoq, quppaqartitilertarlunilu, Nivi Geisler arktisk ingeniøritut naammasseqqammersoq oqaluttuarpoq. Asfalti pillugu suliaq ilinniarnermini immikkut pingaarnerutillugu sammisarisimavaa.
- Misileraasimavunga, misileraanermi tassani polymet asfaltimut akuliuttarsimavagut, kalaallit nunaanni aqquserngit pitsanngortinniarlugit. Uutortaanerma takutippaat polymet 12 procentit asfaltimut akuliukkaanni taava asfalti ukiukkut aqinnerulersarpoq, aasaaneranilu ullumikkut atortakkatsinnit aqilinikinnerusarluni. Taamaalilluni akornutaalersartut pinngitsoortinneqarsinnaapput, Nivi Geisler oqarpoq. Taassuma neriuutigaa misileraanermini angusani asfaltiliortarnermut malunnartumik sipaarutaasinnaassasoq.