Ilinniartitaaneq marlunnit qunneqalissaaq

KIIIN-ip innutaasunik sullissineq ineriartortitsinerlu samminerulerpai, ilinniartitaanermut tunngasut aqutsisoqarfinnut marlunnut avillugit.

Tamanna siullermik innuttaasunik sullissinerup nukittorsarneqarnissaa siunertaralugu pivoq.

Innuttaasunik sullissineq aqutsisoqarfinnik marlunnik tamarmik immikkut suliassanut erseqqissumik killilersukkanut akisussaasussanik pilersitsinikkut nukittorsarneqassaaq.

Ilaatigut ilinniartitaanermik maanna aqutsisoqarfiusoq inuussutissarsiutinut ilinniartitaanermut tunngasut saniatigut aamma ilinniartitaanernut ingerlaqqiffiusunut, ilisimatusarnermut, kulturimut, sunngiffimmut ilageeqarnermullu tunngasunik ilane-qassaaq. Aqutsisoqarfik taanna Kultureqarnermut, Ilinniartitaanermut, Ilisimatusarnermut Ilageeqarnermullu Aqutsisoqarfimmik taagorneqarpoq (KIIIA).

Ilaatigut maanna ilinniagaqarnersiuteqartitsiviusoq Ilinniartut Ineqarfiisa Allaffeqarfiannut (KAF) kattunneqassaaq taamaalillunilu ilinniartut aningaasaqarnerannut inissaqartinneqarnerannullu akisussaalissalluni. Aqutsisoqarfik taanna Ilinniartunut Aqutsisoqarfittut taagorneqarpoq (ILA).

KIIIN ataasiinnanngorpoq

Ingerlatsinermut suliassat aqutsisoqarfinnut taakkununnga marlunnut avissaartinneqarnerisigut naalakkersuisoqarfik ikilileriffiungaatsiassaaq, tamatumunngali peqatigitillugu aamma politikerinut sullissinermik pingaarnertullu ineriartortitsinermik, pilersaarusiornermik aqutsinermillu samminnissinnaassalluni.

Naalakkersuisoqarfimmi sulisut ikilinerat eqqarsaatigalugu, kiisalu pitsaassuseq, suleqatigiinneq, ataqatigiissaarineq suliaqarfiillu akornanni ataqatigiinneq siuarsarniarlugu maanna immikkoortortakkuutaarinerup atorunnaarsinneqarnissaa naalakkersuisoqarfiup aalajangiuppaa, taamaalilluni sulisut tamarmik suliffeqarfimmi ataatsimiittussanngorlugit.

Suliffeqarfiup nutaap innuttaasunik pitsaanerusumik sullissinissamik suliassallu suliarineqarnerisa pitsaasuunissaannik Naalakkersuisut anguniagaannut ikorfartuutaanissaa, kiisalu naalakkersuisut politikikkut pingaartitaannik, taakkununnga ilanngullugu ilinniartitaanermut immikkut suliniarnermik pilersaarusiornermut naammassinninnermullu tunngaviunissaa Naalakkersuisoqarfiup naatsorsuutigaa.

Powered by Labrador CMS