Nuliami toquneranit taarsiivigitittoq
39-inik ukiulik Laila Sylvester Grossmann Sisimiuneersoq misissussallugu ikiussallugulu iliuuserisat naammassimanngillat, qaammatini arlalinni tallimigut sakissamigullu anniaateqareerluni uummammigut milittoornerminik Odensemi toqummat.
Laila Grossmann 2007-imi novembarimi unnuit ilaanni Kertemindep eqqaani Messinge-mi angerlanersimaffimmini toquvoq. Uia TV2-p timersornermut pisortaa Frederik Lauesen tamatuminnga Patientforsikringimiit akuersissutigineqarpoq. Fyens Stifttidende allappoq.
Taperserneqarneq qimagaasimasunut aningaasatigut 1 milioningajannik taarsiivigineqarnermik malitseqarpoq.
- Aningaasat qanorpiaq amerlatiginersut oqaatigerusunngilara, kisianni oqarusuppunga amerikami pisartunit allaanerummata. Taakkua pilersuisumut taarsiissutaapput, kisianni tuppallersaanngillaq, Frederik Lauesen oqarpoq.
Frederi Lauesen B.T.-mut siusinnerusukkut oqaluttuarpoq sakini peqatigalugu ilaqutariit illuutaanni unnuinerminni nuliagigaluani unnuakkkut tassanngaannaq inersaartorunnaarmat ilunersorlutik ajornartumilli annaanniaraluarsimagitsik.
Nuliagigaluata qaammatini arlalinni tallimigut sakissamigullu anniartuarnini maalaarutigalugit nakorsiaqattaartarsimagaluarpoq. Kisianni tamatigut saammarsarneqartarsimavoq, oqarfigineqartarluni "stress"-iinnartoq, taamalu nipaallisaatinik pinissaminut allagarserneqaannartarsimalluni.
- Odense Universitethospitalimi toqusumik misissuinerup takutippaa uummataata taqaani kolesteroleqarpallaartoq, aammalu uummammmigut milittooornini toqqutigigaa.Taannalu siulliusimanngilaq, tassami siusinnerusukkut sapaatit akunneri arlallit sinnerlugit ingerlaneranni pingasoriarluni milittoortarsimavoq, Lailap angutaa Preben Grossmann oqaluttuarpoq.
- Uumitsassimaanngilluinarlunga, kisianni isumaqarpunga nakorsat mianersuaalliornertik qarsupiinnaasimanertillu akisussaaffigalugu nassuerutigisariaqaraat. Anniarujussuarnini pissutigalugit ilaanni seeqqummiinnartariaqartarsimagaluartoq nakorsat stress-iuneraannarlugu oqartarsimapput. Kisianni anniaatit tassaviusimapput uummatikkut noqartoornerit - timaata susinnaajunnaalerneranut ilisarnaataasut, Frederik Lauesen BT-mut oqarpoq.