Ilaqutariit meerartallit ikiorserniarpaat

KANUKOKA-p kommunini isumaginninnermi atuarfeqarnermilu ataatsimiititaliani siulittaasut ingerlatsivinnilu pisortat isumasioqatigiinnissamut qaaqquai.

Isumasioqatigiinneq Ilulissani Hotel Arcticimi pissaaq februaarip 26-anniit marsip 1-annut.

KANUKOKA-p siulersuisui januaari naalersoq aalajangerput piaartumik isumaginninnermut kiisalu atuarfeqarnermut meeqqeriveqarnermullu suliassaqarfinnut tunngatillugu kommunit sisamaasut ataatsimiititaliaanni siulittaasut atorfilittaalu katersuutsinneqassasut.

- Siulersuisut kissaatigaat meeqqanut inuusuttunullu suliniutit aallartinneqareersimasut politikkikkullu siunniussat qanoq atorluarneqarnerunissaat qanorlu ineriartortinneqarnissaat aammalu suliniutit tunngavissallu naammannersut pissusissaattullu atorneqarnersut peqataasunit isumasioqatigiissutigineqassasut.

Taakku saniatigut kommunit kissaateqarnerat naapertorlugu inunnik isumaginninnermi tunniuttakkat aningaasartaasa ullutsinnut naleqqussarnissaat pisariaqarnersoq oqaluuserineqassaaq.

Ilanngullugu kissaatigineqarpoq inatsisit tunngavissat sinaakkutissallu atuutereersut periarfissarititaasa sapinngisamik eqaannerpaamik periataarsinnaassuseqarluartumillu atorneqarsinnaanissaat oqaluuserineqassasoq.

Oqaluuserisassat ilagaat atuarfinni nerisitsisarneq.

Powered by Labrador CMS