KNR aallakaatitassanut inuttassarsiorpoq

Ilaqutariit marluk ujarneqarput Hans Egedip nalaaniit ullumikkumut nunatsinni ilinniartitaanerup oqaluttuarisaanera pillugu aallakaatitassiassanut.

Kinguaariit pingasut ilinniartitaanikkut oqaluttuarisaanerat TV-kkut sammineqassaaq. Ass. Jørn Møller Larsen

Ilinniagaqarnermut il.il naalakkersuisoqarfik KNR-TV suleqatigalugu TV-kkut aallakaatitassiortitsivoq nunatsinni ilinniartitaanerup oqaluttuarisaanera pillugu.

Aallakaatitassiani pingasuusuni piffissaq Hans Egedep tikiffiani 1721-miit ullumimut namminersulerfissamut sammineqassaaq.

Tassunga atatillugu ilaqutariit kinguuariit pingasut oqaluttuartussat pisariaqartinneqarput, tassa aataq/aanaq, erneq/panik kiisalu ernutaq.

Taakkua qanoq atuarsimanerninnik qanorlu ilinniagaqarsimanerminnik oqaluttuarnerisigut ilinniartitaanerup qanoq ineriartorsimanera ersersinniarneqarpoq, KNR nittartakkamini allappoq.

Kinguaariit ataatsit inuussutissarsiutit iluini ilinniarsimasuusinnaapput, soorlu kinguaariinni utoqqartaq ajoqinit atuartinneqarsimasuusoq immaqalu ilinniagaqarluni, kinguaava inuussutissarsiutitigut ilinniagaqarsimasoq kiisalu kinguaariinni nukarlersaq suli naammassisimanngikkuni ilinniagaqartuusinnaalluni soorlu GU-mi allamiluunniit.

Kinguaariit aappaat qaffasissumik ilinniagaqarnermut ikaarsaarsimasuussapput, soorlu utoqqartaq ajoqinit atuartinneqarsimasuusoq immaqalu ilinniagaqarluni, taassuma kinguaava qaffasissumik ilinniagaqarsimasuulluni soorlu universitetimi allamiluunniit, taassumalu kinguaava suli naammassisimanngikkuni ilinniagaqartuusinnaalluni soorlu GU-mi allamiluunniit.

Powered by Labrador CMS