Naja P: Missingersuutit ajorpallaarput
Peqqinnissaqarfimmi aningaasatigut missingersuusiortarnerup ajunnginnerusumik aqunneqartarnissaa anguniarlugu peqqissutsimut naalakkersuisoq misissuisitsivoq.
Peqqinnissaqarfimmi missingersuutit piviusorsiunnginnerarlugit aningaasaqarnermut naalakkersuisup Per Berthelsenip isornartorsiuinera ilassilluarpaa, suliamullu attuumassuteqanngitsunit misissuisoqarnissaq peqqissutsimut naalakkersuisup isumaqatigalugu.
Ukiuni kingullerni missingersuusianit sippuisoqartariaqarsimanerit takutippaat missingersuusiortarnerit pitsaanerusumik aqunneqarnissat, tamannalu pillugu peqqinnissaqarfiup aningaasaqarneranik misissueqqissaartussanik Naja Petersen suliaqartitsivoq.
Misissuitsinerup kingorna paasineqassaaq aningaasaqarnermut aqutsineq aqutseriaatsimillu pitsaanerusumik paasissutissiisarnissaq anguneqassammat, Naja Petersen oqarpoq.
Peqqinnisaqarfimmi aningaasatigut aqutsineq aqutseriaaserlu pitsaanerusoq anguneqassaaq, aammalu aningaasatigut inissisimanera pillugu naalakkersuisut, inatsisartut allallu attuumassuteqartut paasissutissanik pissarsisinnaanissaat ajornannginnerulissammat.