Nakorsat: Aningaasaqarneq pisariaqartitsinermut naapertuuttunngortilli

Kalaallit Nunaanni Nakorsat peqatigiiffiata naalakkersuisut Dronning Ingridip Napparsimmavissuani nakkutilliinnginnerarlugit pisuutippai.

Nakorsat peqatigiiffiata siulittaasuata aamma peqqinnissaqarfiup suliaasa tulleriissaarneqarnissaat ujartorpaa. Assi: Jørgen Chemnitz

Nakorsat nunatsinnit tamaneersut 30-it sisamanngormat Nuummi katersuupput Kalaallit Nunaanni napparsimasunik nakorsaasarnermi killiliussassat oqaluuseriniarlugit.

Nakorsat naalakkersuisunut ilaasortap Naja Petersenip inatsisartunut ilaasortamut Astrid Fleischer Reximut (Demokraatit) DIH-mi pissutsit naalakkersuisut nakkutigigaannik akissuteqarnera tupigusuutigaat.

- Qamuuna ernumanartillugu paasivarput aqutsineq taanna uninngasut qaasiusinnaanerat aningaasaqarnermut sulisoqarnermullu naleqqussarlugu aqutsinertut anguneqarsimasoq. Suliniutit taakkua kalaallit nunaanni innuttaasunut suliaritinnissamut neqeroorutit malunnartumik ikileriartinneqarnissaannik malitseqassanersoq naalakkersuisunut ilaasortamiit erseqqissumik nalunaartoqarnissaa amigaatigaatput, nakorsat oqaaseqammi allapput.

Nakorsat isumaqarput suliaritinnissamut neqeroorutit aningaasaqassutsimut naleqqussarneqarnissaat kukkunerusoq, illuatungaanut saatinnissaa pissusissamisoornerugaluartoq, tassa aningaasaqassuseq suliaritinnissamut pisariaqartitsinermut naleqqussarlugu.

- Nakorsaqatigiit napparsimasuni passussisarnerup iluani tulleriissaarinissaq pisariaqarluinnartutut isigaat. Kalaallit Nunaanni peqqinnissaqarfimmi nakorsarneqarnissamut neqeroorutaasinnaasut sunneri pillugit politikerit, innuttaasut peqqinnissaqarfinnilu sulisut oqaloqatigiilernissaat atorfissaqartipparput, siulittaasoq Jesper Olesen aamma siulittaasup tullia Ole Lind allapput.

Powered by Labrador CMS