Qimmit nappaataat pisuuvoq
Savissivimmi qimmit toqorarnerat qimmit nappaalanerannik pissuteqartoq uumasut nakorsaata Mads Thor Madsenip uppernarsivaa.
Uumasunut nakorsaqarnermi immikkoortortaqarfik, Inuussutissarsiornermut Suliffeqarnermullu Naalakkersuisoqarfiup ataaniittoq ullumi Uumasut Nakorsaqarfiannit Københavnimiittumit akissutisivoq piffissami kingullermi Savissivimmi qimmit qimuttut toqorarnerannut pissutaasoq pillugu.
Pissutaasoq tassaavoq qimmit nappaataat virusimik tunillannartorujussuarmik aallaavilik.
Qimmit nappaammik taassuminnga tunillatsissimasut katsorsarneqarsinnaanngillat taamaammallu Uumasunut Nakorsaqarfimmit qimmiutillit tamarmik kaammattorneqassapput qimmit nappaataannut akiuussutissamik qimmitik tamaasa kapineqarnissaat isumageqqullugu.
Qimuttunik qimmiutilinnut akiuussutissiineq akeqanngilaq, akiuussutissiineq Namminersornerullutik Oqartussat akilissammassuk. Kommunimi qimmilerisoq qaninnerpaaq piffissamik inniminniinissaq siunertaralugu attavigineqassaaq.