Peqqinnissaqarfik iluarisimaarpaat
Atuisunik isumasiuinerup kingulliup takutippaa 2005-imit 2007-imut peqqinnissaqarfiup kiffartuussinera iluarsisimaarneqartoq.
Issittumi nappaatit pillugit ilisimatooq, Peter Bjerregaard, napparsimasut katsorsartinniartut sulissuneqarnerminnik qanoq iluarusutsiginerata nalilerneqarnerat, peqqinnissaqarfimmi pisortat ataatsimeersuarneranni saqqummiuppaa.
- Nappasimasut katsorsartinniartut sulissunneqarnerminnik qanoq iluarusutsiginerat 1993-imi misissoriarlutigu 2007-imi misissoqqikkatsigu, iluarusunnerujartortut malugisinnaavarput, ilisimatooq Peter Bjerregaard ataatsimmeersuarnermi saqqummiussinermini taamatut oqarpoq.
Katsorsartinniartulli suut iluarusuutigineraat erseqqissumik saqqummiunneqanngillat. Katsorsartinniarluni utaqqivallaartarneq sulisullu paasissutissiinissaminnut piffissaajatsisarnerat naammagineqanngitsoq, misissuinermi paasisat ilagaat.
Katsorsartinniartut sulissunneqarnerminnut atatillugu naammaginninnerulersinniaraanni peqqinnissaqarfimmi ataavartumik sulisoqarsinnaalernissaq anguniarneqartariaqarpoq, sulisunullu atugassarititaasut pitsanngorsarneqartariaqarlutik, sulisut suliffimminni qanoq misigisimaneri katsorsartinniartunit maluginiarneqartuartarmata, ilisimatooq Peter Bjerregaard KNR-ip radioaviisianut oqarpoq.
Peter Bjerregaardip erseqqissarpaa ukiuni kingullerni peqqinnissaqarfimmi ajalusooriartuinnarneq pillugu sakkortuumik isornartoqartitsinerit saqqumminnginneranni misissuinerit ingerlanneqarsimasut.