Imminorniartut amerlasuut ukioq kingulleq ikioqqusimapput
Imminornissamik eqqarsaateqartut katillugit 164-it ukioq kingulleq taamanikkut Nuup Kommuniata upalungaarsimanissamut oqarasuaataanut sianersimapput.
Sianersimasut affaat sinnilaarlugit ingerlaqqinnissaannut ikorneqarsimapput.
Inuit 32-it psykologimut innersuunneqarsimapput, 23-it isumaginninnermut allaffimmut aammalu 13-it nakorsiartarfimmut.
Sinerissamiit sianersimasut amerlanngitsut telefonimut nuna tamakkerlugu ammasumut nr. 146-mut, politiinut imaluunniit ilaqutariinnut siunnersortimut innersuunneqartarsimapput. Saaffiginnittut amerlanersaat arnaasimapput.
Siunersorti Marie Lyberth pitsaaliuinermullu siunnersorti Line Dalentoft ukiumoortumik nalunaarusiami piareersimanissamut siunnersuinermullu neqeroorutip Piareersimasut atuutsiinnarnissaat ineriartortittuarnissaallu suli pisariaqartinneqartoq inerniliuppaat.
- Piareersimasuni sulisut imaannaanngitsunik suliaqartarput, aamma pigaartut avataaneersut suliinnarniartittarnerat ajornakusoorpoq, ilarpassui akissarsiatigut akikippallaarnera peqqutigalugu taamaatinniartarmata, nalunaarusiami allassimavoq.
Piareersimasut telefoniat 55 57 38 ullut tamaasa nalunaaqutaq 8.00-16.00 aamma 19.00-22.00 ammasarpoq.