Nunat avannarliit killiit politikerii Bruxellesimi

Nunat Avannarliit Killiit soqutigisaat Europaparlamentimi oqallisigineqarput.

Nunat Avannarliit Killiit Siunnersuisoqatigiivisa siulittaasuata Kári P. Højgaardip sisamanngornermi ullaakkut Europaparlamentimi oqalugiarnermini erseqqissarpaa, nunarsuarmi naalagaaffiit maanakornit annertunerusumik nunarsuup issittortaanut samminiarnerulertariaqartut aammalu ajornartorsiutit takkuttussat aaqqinniarnerannut peqataallutik.

Kári oqarpoq pinngortitap napparsimalerneranut ersiutit Issittumi takkuteqqaartartut aammalu tamaani silaannaap allanngoriartornerisa kinguneri malunnarnerpaasartut.

- Taamaattumik pingaarutilerujussuuvoq nunarsuarmi naalagaaffiit ilisimatusarnermut annertuumik suliniuteqarnissaat, oqarpoq.

Kárip erseqqissarpaa Savalimmiut unamminartortaasut pimoorukkai aammalu silaannaap allanngoriartornerisa imaanut sunniutaasa ilisimatusarfigineqarnissaat assut pingaartikkaa.

Savalimmiuni Aalisarnermut Misissuisoqarfiata Bogi Hansen - Nunat Avannarliit Siunnersuisoqatigiivisa Avatangiisinut nersornaataannik nersornaaserneqartoq - aqutsisoralugu imaq Savalimmiut eqqaaniittoq ilisimatusarfigaat. Tamatumani siunertarineqarluni siullertut immaq imaani uumassuseqassutsimut sunniutaasa aappaattullu silaannaap ingerlaartarneranut immaq pingaarutaasa paasisimasaqarfiginissaat.

Kári Nunat Avannarliit Killiit Siunnersuisoqatigiiffiata siulittaasuattut Bruxellesimi ataatsimiinnernut arlalinnut inatsisartut siulittaasuat Ruth Heilmann aamma altingimi ilaasortaq karl V. Matthiasson peqatigalugit ulluni februaarip 25-26-ini peqataasussaavoq.

Ullaaq manna ataatsimiinnermi sammineqarpoq EU-p Avannamut Annertussusia, politikerinit naalakersuinermillu sulialinnit Canadamiit, Ruslandimiit, Norgemiit, Tysklandimiit aammalu nunanit avannarlernit tamanit nunanillu baltikumimeersunit tamanit peqataaffigineqartumik Europaparlamentimit aaqqissuussaavoq.

Nunat Avannarliit Killiiit Siunnersuisoqatigiivisa Siulittaasoqarfiata Europaparlamentip aallartitai nunanut avannarlernut attaveqartuusut paasissutisseeqatigiilluni ataatsimiinnermi marlunngornermi ataatsimeeqatigaat.

Ataatsimiinnermi siulittaasup ilaatigut erseqqissarpaa immap pisuussutaanik atorluaaneq nunanut avannarlernut killermiunut tunngaviusumik isumaasoq, aammalu tamanna nunat taakku kulturiinut, oqaluttuarisaanerannut inuussutissarsiornerannullu ataqatigiissumik atasuusut, aammalu nungusaataanngitsumik puisinniarneq arfanniarnerlu nunat avannarliit killiit piginnaatitaaffigiinnarnagu pisussaaffigigaat.

Kárip aamma erseqqissarpaa Atlantikup avannaani umiartornermi sillimaniarneq naammaginanngitsuusoq, taamaattumillu aamma nunat Atlantikup avannaanut sineriaqartut immaanitug annaassiniartarneq eqqarsaatigalugu suleqatigiinnertik ataqatigiissaarinertillu pitsanngorsartariaqaraat.

Altingimut ilaasortap Karl V. Matthiassonip EU-p aalisarnermut ataatsimoortumik politikkia isornartorsiorpaa, isumaqarluni taanna sutigut tamatigut nungusaataanngitsumik ingerlatsinerunngitsoq.

Kalaallit Nunaanni inatsisartut siulittaasuata Ruth Heilmannip erseqqissarpaa Europaparlamentip puisuip amiinik tunisassiat eqqunneqartarnerisa inerteqquteqalersaarnera inunnut ilaqutariinnut nunaqarfinni avinngarusimasuni inuusunut allatigut suliffissarsiornissamut periarfissaqanngitsunut inuuniarnikkut aningaasarsiornikkullu sakkortuumik kinguneqarsinnaasoq.

Ruthip oqaatigaa Kalaalllit Nunaata maanna ukiut pingajuat avillugu ingerlaneranni puisip amiinik aningaasaqarnikkut annaasaqaataanngitsumik nioqqutissiorsinnaaneq sorsuutigisimagaa, taamaattumillu puisip amiinik tunisassiornermut inerteqquteqarneq alianartuusoq, aammalu ilaqutariit inuit amerlaqisut siunissartik ernummatigigaat.

Inatsisartut siulittaasuata naalakersuinermik suliaqartunut najuuttunut puisinniarnerup kalaallit nunaanni innuttaasunut ullumikkumut allaat qanoq pingaaruteqartiginera erseqqissarpaa - aningaasarsiornikkut kulturikullu.

Powered by Labrador CMS