Qaanaami peqqissutsikkut misissuineq annertooq
Peqqissutsimut ministerip Jacob Axel Nielsenip Qaanaami innuttaasut misissorneqarnissaat tapersersorusuppaa. Tamanna pissaaq timmisartorsuup 1968-imi nakkarnerata kingorna peqqissutsikkut navianaatit annertuseriarsimasut paasiniarlugu.
- Jacok Axel Nielsen Qaanaami eqqaanilu innuttaasut peqqissutsikkut misissorneqarnissaat pillugu danskit naalakkersuisuisa qulakkiissaneraat toqqaannartumik aperineqarnermini akissutaa aappiuvoq.
Aamma Uusaqqak Qujaukitsoq Qaanaami peqatigiiffimmit Hingitaq 53-imeersoq kalaallit nunaannut tunngasunut ataatsimiitsitaliami - aamma tusarnaartunut ammasumik - ataatsimeereernerup kingorna nuannaarpoq.
- Ataatsimiinneq assut naammagiisimaarpara, aamma maani isumaga anissinnaasimagakku nuannaarutigaara, Uusaqqak oqarpoq.
Kisianni ukiut taamak amerlatigisut ingerlasimanera naammaginngilaa.
- Kisianni neriuutigaara ernumanerput ullumikkut paasisimassagaat, ataatsimiinerup kingorna oqarpoq.
Kisianni Jacob Axel Nielsenip peqqissutsikkut misissuinissami Thulemi sulisuusimasut ilanngunneqarnissaat naaggaarpaa, ilaatigut 1968-imi ajutoornerup kingorna saleeqataasimasut.
- Thulemi sulisunut tunngatillugu naalakkersuisut suliaq naammassereersutut isigaat, taamak peqqissutsimut ministeri oqarpoq. Nassuiaammini saqqummiuppaa Thulemi sulisut saleeqataasimasut pillugit misissuinerit arlallit ingerlanneqareersimasut.
- Thulemi sulisut saleeqataasimasut napparsimalersimanngillat, tamanna misissuinerit uppernarsareerpaat, Jacob Axel Nielsen oqarpoq.
Uusaqqak Qujaukitsup kissaatigerpiaraluarpaa Uummannap eqqaani laboratoriamik pilersitsisoqarnissaa, tassuunakkut uumasunut inunnullu kinguerisinnaasai suulluunniit nakkutigineqarsinnaassammata.
Peqqissutsimut ministeri Jacob Axel Nielsen toqqaannartumik itigartitsinngilaq, kisiannili aamma neriorsuinani.
- Laboratoriami pilersitsisinnaanermut siunnersuummik takusaqarsimanngilanga, Jacob oqarpoq.