Misissuinerit nutaat

Ilaatigut Tunumi, ilaatigullu Baffin Bugtimi nannut amerlassusaat ilisimalerniarlugu Pinngortitaleriffik siunnersuuteqarsimavoq nutaamik kisitsisoqassasoq.

?– Apeqqutaavorli nannut amerlisimanersut imaluunniit siammarsimnerat allanngorsimanersoq. Tamanna maannakkorpiaq nangaassutigineqarpoq, Erik W. Born ?Pinngortitaleriffimmeersoq, oqarpoq. Taanna IUCN-ip ataani nunat tamalaat nannunik immikkut ilisimasalittaanni ilaavoq. Ass.:?Leiff Josefsen.

Siunnersuutigineqarpoq 2010-mi timmisartumik Tunumi nannut kisinneqassasut, 2011-milu Baffin Bugtimi nannut kisinneqassasut, canadamiut suleqatigalugit.

Biologit neriuutigisaattut pisoqassappat, tamatuma kingorna kisitsisaateqalertoqassaaq, kinbgullermik 1997-imi Baffin Bugtimi kisitsinermut sanilliunneqarsinnaasunik. Ilisimaneqanngilluinnarpoq Tunumi nannut qanoq amerlatiginersut.

Tamatuma saniatigut Baffin Bugtimi Kane Bassinimilu nannut amerlassusaat nalilerneqarsinnaapput Nunatta kitaani Canadamilu pisanit nalunaarutigineqartunit nannut amerlassusaannut sanilliullugit, Pinngortitaleriffimmi nannunut immikkut ilisimasalik Erik W. Born oqaluttuarpoq. Taanna PSBG-mi, 1968-imi IUCN-imit pilersinneqartumi, nannunik immikkut ilisimasallit ilagaat. (PSBS, Polar Bear Specialist Group, aaqqiss.).

?Bornip tikkuarpaa pingaaruteqartorujussuusoq paasissallugu ukiuni kingullerni 10-15-ini Baffin Bugtimi sikup annikilliartorsimanera. Taamaattumik naatsorsuutigisariaqarpoq nannut tamanna qisuariarfigissagaat, soorlu Canadami Alaskamilu sumiiffiit ilaanni taamatut pisoqarsimasoq. Tassa imaappoq, nannut nunamiinnerulerlutik. Tamannali Kalaallit Nunaanni misissorneqarsimanngilaq.

Baffin Islandilli kangisissuani Nunattalu kitaata avannaani piniartut oqarput, sinerissami nannunniartarfimminni nannut amerlisimasut.

– Tamanna arlalinnit paasineqarpoq nannut amerlanerulersimasut. Apeqqutaavorli nannut amerlisimanersut imaluunniit siammarsimnerat allanngorsimanersoq. Tamanna maannakkorpiaq nangaassutigineqarpoq, Erik W. Born oqarpoq.

Sermitsiaq/9 atuaruk.

Powered by Labrador CMS