Anaanaasup meerarsiaq marsip 26-anni aassavaa

Qeqqata Kommuniata qulinik qaammatilik meerarsiaasoq minutsit 15-it sioqqullugit kalerriilluni aassavaa.

Assi: Polfoto

Nukappiaraq qulinik qaammatilik angajoqqaarsiaasa ilaqutaviisalun akornanni pisortanit uteqattaarunneqarsimasoq pillugu suliaq sisamanngornermi marsip 26-iani naggaserneqarallartussanngorpoq, knr.gl allappoq.

Nukappiaraq inunngormalli angajoqqaarsiaminiitinneqarpoq, meeravissiartaarnissaq siunertaralugu. Kisianni tamatuma kingorna meeraq sapaatit akunnerinik arfineq-marlunnik utoqqaatigisoq ilaqutaviusut peqqissimisimapput. Kisianni qaammatit arfineq-pingasungajaat aatsaat qaangiuttut angajoqqaarsiaasut meeraq tunniutissagaat naalakkerneqarput.

Aallaqqaammut meeraq aanaata tigusussaagaluarpaa. Kisianni maanna paasinarsivoq nukappiaraq anaanaminit aaneqassasoq - tamatumalu kingorna nukappiaraq aanamini meerarsianngussaaq, anaanaasup aanaajusullu akunnerminni isumaqatigiissuteqarnerisigut, angajoqqaarsiaasut ilisimatitsipput.

- Qeqqata Kommunianiit allakkanik tigusaqarpugut, taakkunatigut ilisimatinneqarpugut meeravissiartaarnissaq siunertaralugu meerarsiaqarnissamut akuersissut atorunnaarsinneqartoq. Aammalu anaanaasup nukappiaraq marsip 26-ani aassagaa, ataatarsiaasoq kinaassutsiminik isertuusserusuttoq ilisimatitsivoq.

Nukappiaraq angajoqqaarsiaaniit peersinniarlugu kommuni aalajangersimavoq, naak taamatut nuutitsineq meeqqamut itisuumik innarliissutaasinnaasoq psykologip nalunnaarusiamini inerniliukkaluaraa.

Allakkat sisamanngornermi marsip 19-iani takkupput. Kisianni tamatuma kingorna kommunimi sulianik ingerlatsisoq nalunaarpoq, nammineq meeraq ulloq taanna aaleruniuk minuttinik 15-inik sioqqullugu kalerriilluni aaniarini. Tamatumunnga angajoqqaarsiaasut akerliliipput – tassanilu kommuni allamik inaarutaasumillu aalajangiinngippat meeraq anaanavianut taamaallaat tunniunneqartussaasoq.

Powered by Labrador CMS