Saassussineq demokratiimut saassussineruvoq
Demokraatit Siumullu naalakkersuisut siulittaasuannik arfininngormat saassussineq akuerisinnaanngilaat sakkortuumillu pillaanissaq piumasaralugu.
- Demokraatit saassusineq demokratiimut toqqaannartumik saassissinertut isigaat, aamma neriuutigaat eqqartuussivinnik ingerlatsinermik suliaqartut taamatut pissusilersornerit akuerineqarsinnaannginnerat pillugu sakkortuumik takutitsiniarumaartut.
Demokraatit siulittaasuat Jens B. Frederiksen allappoq.
- Naalakkersuisut siulittaasuugaanni qanorluunniit ittunik nalaataqaataasinnaavoq. Taamaakkaluartoq killeqartariaqarpoq, matumani pineqartoq pillugu saassissineq sioorasaarinerlu atorneqarsimatillugit.
Kikkut tamaasa qinnuigai pisimasumi matumani ataatsimooqatigiinnissamik aammalu Hans Enoksenip pinerliivigineqarsimanera akuerinninnginnissaq.
- Hans Enoksen isumaqatiginngikulavarput. Allaammi isumaqarpugut taassuma politikkia nunatsinnut akornusiisoq, kisianni tamanna Hans Enoksenimik saassussinissamik qanorluunniit pisussaaffiliinngilaq. Hans Enoksen demokratii tunngavigalugu qinigaavoq, taamaattumilli demokratiip tunngavii atorlugit akerlilersorneqassalluni.
- Tamannarpiarlu pissutigalugu Enoksenimut saassussineq tassungaannaq saassussinerunngilaq - aamma uagut demokratiitsinnut saassussineruvoq. Tamanna akuersaanneqanngisaannassaaq. Aamma nipangersaannarneqassanngilaq. Akerlianik pisimasoq sutigulluunniit akuersaarsinnaanngilluinnaripput nipiluutiuutigisariaqarparput.
Siumup Nuummi siulittaasua Kim Godtfredsen taamatuttaaq isumaqarpoq.
- Hans Enoksenimut aqqusiniinnarmi saassussineq annilaarnarlunilu assorujussuaq akueriuminaappoq. Iliuuserineqartoq demokratiimut toqqaannartumik navianartorsiortitsisuuvoq inuinnaallu qinigaannut kannguttaatsuliornerulluni, Kim Godtfredsen allappoq.