Nappaat nutaaq ernumatitsivoq
Kinguaassiuutitigut nappaat mycoplasma klamydiatut meerartaarsinnaajunnaarsitsisinnaasoq amerlasuut sianiginagu attataraat.
Nuummi najugallit 149-t misissornerisigut paasineqarpoq taakku 7 procentii, tassalu qulit mycoplasmamik tunillanneqarsimasut. Bakteeria pasineqartarpoq klamydiatulli kinguneqartarsoralugu, tassalu naartusinnaajunnaartitsisarluni, inortunik meerartaartitsisarluni HIV-millu tunillanneqarnissamut qaninnerulersitsisarluni.
Nunatsinni aatsaavissuaq bakteeria taanna misissuinikkut nassaarineqarpoq, paasineqarneralu ilisimatuut ernumanartoqartippaat.
–149-nit qulit taama bakteeriamik attataqarnerat ernumanaateqarpoq. Misissuinngikkallaratta naluarput mycoplasma Kalaallit Nunaanni nappaatigineqarnersoq, maannali uppernarsivarput maaniittoq, klamydiatulli atugaatigisoq penicillinamilu katsorsarneqarsinnaanngitsoq, Dionne G. Law oqarpoq.
Bakteeriali nakorsaatinik allanik nungutinneqarsinnaavoq, inuillu qulit bakteeriamik pigisaqartut aappaallu tamarmik nakorsarneqareerput.
Annerusumik atuarsinnaavutit Sermitsiami tallimanngornermi saqqummersumi.