CIA-mik misissuineq nersorpaat
Naalakkersuisut CIAp parnaarussanut timmisartuinik misissuinera torrallataavoq, FN-imi naalliutsitsisarnermut tunngasunik ilisimasalik oqarpoq, attuumassuteqannngitsunillu misissuisoqarnissaa inassutigalugu
FN-ip naalliutsitsisarnermut inuillu pisinnaatitaaffiinut tunngasunik misissuisartuata Manfred Nowak-ip qallunaat naalakkersuisuisa CIAp unioqqutitsilluni Danmarkip Kalaallit Nunaata silaannartaasigoorluni anngiortumik timmisartuussisarnerinik pasitsaassinermik misissuisimanerat nersorpaa. Timmisartuussisoqartarsimanera USAp uppernarsarumanaguluunniit eqqunngitsuunerarumanngilaa, USA-lli nunanut allanut ministererisimasaa Condoleeza Rice Danmarkimi pisortat atassuteqarfigineqaqqaartalernissaannik neriorsuisimavoq.Manfred Nowak tamakkununnga tunngasut qulaajarluarneqarnissaat pillugu attuumassuteqanngitsunik misissueqataasoqarnissaanik inassuteqarpoq.
Danmark pillugu FN-ip Generalforsamlingianut ukiumoortumik nalunaarusiaani tamakku takuneqarsinnaapput. Tassanilu aamma peqqarniisaarniaasorineqartut naalliutsinneqannginnissaat pillugu nunagissaannut utertinneqannginnerini naalliutsinneqannginnissaannik naalakkersuisut uppernarsaateqartarnissaannik pilersaarutit mianersoqqussutigai. Ilaatigut Tuluit Nunaat taamaaliortatpoq.
Nalunaarusiami Manfred Nowakip aamma eqqartorpai parnaarussiviit mattusimatitsiviillu, angerlarsimaffimmi peqqarniitsuliortarneq, arnanik nioqquteqartarneq naalliutsitsisarnerlu. Ilaatigullu politeeqarfinnut, parnaarussivinnut, eqqarsartaatsikkut katsorsaavinnut nunassinniartullu angerlarsimaffiinut pulaartarsimavoq.
Parnaarussaasimasut naalliutsinneqarnermut kanngutaatsuliorfigineqarnermullu maalaaruteqarsinnaanerat eqqartoraluarlugu aamma imminut naammagisimaarpallaarsinnaaneq mianersoqqussutigaa, pisortalli pasilliinernik tamanik misissueqqissaartarnissaat pisuussuteqartunillu pillaanernik misissuisarnissaat inassutigalugu. Naalliutsitsisarnerup Danmarkimi pillaasarnermut inatsisitigut inerteqqutaannginnera Mandred Nowakip ajuusaarutigaa, naak pisortat pinerluttulerinermi inatsisit aqqutigalugit arlaleriarlutik peqqarniisaartarneq sukanganerusumik isiginiarneqartittaraluaraat.
Danmarkimi parnaarussiviit arlalitsigut pitsaalluinnartuupput, aammalu Danmarkimi Kalaallit Nunaannilu parnaarussiviit ammasut arlalissuupput. Angutinik arnanillu taakkunaniittoqartarpoq, parnaarussivimmiittulli sukkulluunniit atugarliortitaannginnissaannik nunani tamani inassuteqaatit malinneqarnissaat pisortat malittariaqarpaat.
Arnanik annersaasarneq
Manfred Nowakip naalakkersuisut sorpai angerlarsimaffinni arnanik annersaasarnermut pinerluttuliornikkullu arnanik nioqquteqartarnermik killiliiniarmata. Naalakkersuisulli arnanik annersagaasimasunik ikiorsiiniaratik nunagisaannut angerlartitsiinnartarnerat isumakuluutigaa. Kalaallit Nunaannullu tunngatillugu pisortat angerlarsimaffinni annersaasarnermik akiuiniarneroqqullugit inappai.
FN-imi paasisimasaqarluartup 2008-imi nalunaarusiarisimasamisuulli parnaarussivinni mattusimatitsisarneq - pingaartumillu tigummigallaasarneq - isumakuluutigai.
– Mattusimatitsisarnerup eqqarsartaatsikkut peqqissutsimut ajoqutaasarnera uppernarsarneqareernikuuvoq taamaattumillu pinngitsoorniarneqarlunilu pisariaqarluinnartillugu imaluunniit misissuineq pissutigalugu pisariaqartillugu aatsaat atorneqartariaqarluni. Tamatigulli sapinngisamik sivikinnerpaamik mattusimatitsisoqartassaaq, Manfred Nowak oqarpoq.