Politikerit Tasiortamut ambassadørinngorput
Folketingimut inatsisartunullu ilaasortaq Juliane Henningsen aamma KANUKOKAp siulittaasua Enok Sandgreen, Siumut, kinguaassiutitigut atornerlugaasarnermut akerliulluni suliniaqatigiiffimmut Tasiortamut ambassadørinngussapput.
Inuit taakku marluk inersimasut meeraallutik kinguaassiutitigut atornerlugaasimasut ikiorniarlugit nammineq kajumissutsiminnik sulisut tapersersorniarlugit angersimapput, knr.gl allappoq.
Tasiortap ambassadørit taakku marluk tapersersortigalugit kinguaassiutigigut atornerluisarnerup siunissami sammineqarnerulernissaa neriuutigaa.
- Kinguaassiutigitut nakuuserneq kinguaassiutitigut atornerluinerup qaavatigut aamma amerlasoorpassuartigut tarnikkut timikkullu nakuusernertaqartarpoq. Taamaattumik Tasiortap anguniagaanut naapertuulluinnassaaq arnat ulluanni sapaammi marsip 8-ni arnanut nakuusertarneq sammineqartussaammat, Arnaq Grønvold Tasiortami siulittaasuusoq oqarpoq.
Peqatigiiffik ilaatigut normu 141 atorlugu kinaassutsumik isertuussinertalimmik telefonikkut siunnersuisartuuvoq.