Inuusuttut meerartaarnissaannut kimigiiserfigineqartarput
Arnat inuusuttuaqqat teenagerit amerlanertigut anaananngornissaminnut piareersimaneq ajorput, tamannalu kinguneqarsinnaasarpoq meeqqap sumiginnagaaneranik
Tasiilami juumooq KNR-imut oqaluttuarpoq ilaqutariit inuusuttut kimigiiserfigisaraat meerartaarnissaannut, naak angajoqqaanngornissaannut piareersimanngikkaluartut.
– Amerlanertigut inuusuttuaqqap arnap meerartaarnissani kissaatigineq ajorpaa, kisianni aanaminit kimigiiserfigineqartarpoq oqarfigalugu "meeraq uanga tigujumaarpara". Amerlanertigullu arnap inuusuttuaqqap angutiviaa peqarneq ajorpoq imaluunniit saqqumineq ajorluni. Taamaattumik tamakku pissutigalugit meeqqat toqqissisimaneq ajorput, sumiginnagaanissaallu aanaralannguusarluni, juumooq Susanne Houd KNR-mut oqarpoq.
Aamma oqaluttuarpoq Tasiilami arnat naartusut 20 procentii 14-init aamma 18-init akornanni ukioqartuusut. Aamma isumaqarpoq isumaginninnikkut ikiorneqarnissaat ajornarnerulersimasoq kommunerujussuanngornerup kingorna.
– Siornatigut isumaginninnermi siunnersortit suleqatigilluarpagut, kisianni ukiarmili tamanna ajorsiartorpoq. Aamma misigisimavara Nuuk ungasissorujussuusoq, Susanne Houd oqarpoq.