Sullitanut piffissaq sivisunerusoq atorusunneqarpoq
Sulinermi piffissaq allaffissornermut atorneqartartoq annertuvallaaqaaq kiisalu sullitanik toqqaannartumik sullissisarnermut piffissaq sivikippallaarluni, kommunit meeqqat kaattut pillugit isumasioqatigiinneranni inerniliinerit ilaat taamaappoq.
Kommunini ataatsimiititalianut siulittaasut aamma isumaginninnermut atuarfeqarnermullu ingerlatsivinni pisortat isumasioqatigeeqqammerput, suliniutissallu kiisalu iliuseqarfigineqartussat ilaqutariinnik meerartalinnik ikiorsiiniarnermut piffissami qaninnerusumi ungasinnerusumik ingerlanneqartussat pingaarnerit erseqqissarlugit.
Isumasioqatigiinnermiit inerniniliinerit kiisalu inassuteqaatit arlaqartut oqariartuutigineqarput, ilaatigut saqqummiunneqarpoq kommunini atorfillit erloqissutigisaat toqqaannartumik sullitanik sullissinermut piffissaq atortagaqartik sivikippallaartartoq.
– Pisortanit ikiorsiisarneq pillugu inatsit aammattaaq meeqqanik kiisalu inuusuttunik ikiorsiisarneq pillugu inatsit nunatsinni pissutsinut naleqqussarneqartariaqarput pisariinnerusariaqarput paasiuminarnerullutillu kiisalu allaffissornikkut piffissaajaataavallaanatik. Ullumikkut piffissarujussuaq allaffissornermi sulinermut atorneqartarpoq - sullissisut sullitaminnut sivisunerusumik piffissaqarusupput, kommuneqarfiit kattuffiata KANUKOKAp siulittaasua Enok Sandgreen isumasioqatigiinnermi peqataasut sinnerlugit nalunaarpoq.
Isumasioqatigiinnermi, sapaatiummat 1. marsi naammassineqartumi, peqataasut piumasaqaatigaat meeqqat tapisiaasa qaffanneqarnissaat. Erseqqissarneqarporlu Naalakkersuisut atuarfinni nerisaqartarnermut aningaasaliissutaat 5,9 millionit koruunit ikippallaartut.
– Aningaasat amerlanerujussuit pisariaqartinneqarput, meeqqat kaattut pillugit isumasioqatigiinnermi peqataasut oqarput, isumasioqatigiinneq Ilulissani ingerlanneqarpoq.