Meeqqat pisinnaatitaaffii qitiutillugit
Peqatigiiffiup Foreningen Grønlandske Børn sapaatit akunneranni uani Sisimiuni atuartut tikeraarpaat meeqqat pisinnaatitaaffii pillugit ilinniartinniarlugit.
Inuusuttut namminneq piumassusertik tunngavigalugu pinnguaatigaluni isiginnaartitsinissamik ilitsersuisartut Foreningen Grønlandske Børnimeersut uani sapaatit akunneranni Sisimiunut aallassapput, atuartut annerit meeqqat pisinnaatitaaffii pillugit pinnguaatigaluni isiginnaartitsisinnaanermik ilinniartikkiartorlugit.
Pinnguaatigaluni isiginnaartitsinermi atuartut namminneq timimikkut misigissavaat eqqarsaatigilerlugulu namminneq aamma meeqqat allat ulluinnarni inuunerat - Kalaallit Nunaanni aamma nunarsuarmi nunani allani.
Pinnguaatigaluni isiginnaartitsinissamik ilitsersuisartut, tamarmik namminne piumassusertik tunngavigalugu sulisut isumaqarput Kalaallit Nunaanni meeqqat aamma inuusuttut pisinnaatitaafitik pillugit ilinniartineqarnissaat, kiisalu namminneq pisinnaatitaaffitik suusupagineqarpata iliuuseqarsinnaanissaat pingaaruteqartoq.
Peqatigiiffiup Foreningen Grønlandske Børn aggustimi 2008-mi namminneq piumassusertik tunngavigalugu pinnguaatigaluniisiginnaartitsinissamik ilitsersuisartunik ilinniartitsipput. Ukiap ingerlanerani 2008-mi ilitsersuisartut Narsami, Paamiuni, Qaqortumi aamma Uummannami meeqqat atuarfiinut tikeraarput, taakkunani meeqqat pisinnaatitaaffii pillugit pinnguaatigalugu isiginnaartitsinissamik ilitsersuillutik.
Tamanna assorsuaq iluatsilluarpoq, suliniummi aqutsisoq Sissel Lea Nielsen oqaluttuarpoq.
- Atuartut meeqqat pisinnaatitaaffii pillugit annertuumik ilikkagaqarput tamatumunngalu ilutigitillugu nuannisaajutigalutik. Meeqqat pisinnaatitaaffii pillugit annertunerusumik paasisaqarnissaminnut kajuminnerulerput, kiisalu iliuuseqarnissaminnut piumassuseqalerlutik pisinnaatitaaffitik suusupagineqartut misigigunikku.
Tamanna tunngavigalugu peqatigiiffiup Foreningen Grønlandske Børn toqqarsimavaa suliniut 2009-mi aamma 2010-mi ingerlateqqinniarlugu kiisalu Kalaallit Nunaanni illoqarfiit tamaasa tikinniarlugit. Taamaattumik atuarfiit soqutiginnittut nangaassuteqarnatik uagutsinnut attaveqarsinnaapput.
Meeqqat pisinnaatitaaffii pillugit suliniut Sorlak aamma Ungdommens Røde Kors suleqatigalugit ingerlanneqarpoq.