Ufo-t pillugit isertugaatit saqqummiunneqartut

Sakkutuut timmisartortartut ufo-t pillugit allattorsimasuutaat assigiinngitsunik qimerluugassaqarfiupput. Ataaseq malugeqquvorlusooq - tassalu sakkutooqarfimmi Pituffimmi pisimasoq

5. januar 1981. Nal. 12.50, Kalaallit Nunaata inoqajuitsuani sila kaperlanneranik taartuinnaavoq. 56-inik ukiulik maskiinalerisartoq inuunermini aatsaat taama tupatsigaaq. Issoqqaarissoq ikumasoq naqqannittarfiusaq nuivoq nunamit sikorasaartumi 45 gradimit Thule Air Basep qanittuani.

Naqqannittarfiusaq kujammut kangianiippoq qaqqallu tungaanut timmilluni, nunamillu 30 gradinik nuisatigaluni peeruppoq. Nipeqanngilaq, pujuliunngilaq.

Tassanngaanniit ungasinngitsumi amerikkarmiut sakkutooqarfimmi issiapput radarilu nakkutigalugu. Piffissamilu tassanerpiaq - nal. 12.50 - suuneranik paasineqarsinnaanngitsoq timmisoq allallugu nalunaarutigineqarpoq. Tassa ufo.

- Aap, oqaluttuaq taanna pissanganarpoq. Maluginiakkama taanna ilagaat, sakkutuut timmisartortartuni kaptajniusoq Thomas Pedersen aviisimut Urbanimut oqarpoq pingasunngornermi Illersornissamut Sakkutooqarfiup 329-nik quppernilik Danmarkip silaannakkut oqartussaaffigisaani ufo-nik takusaqartarsimanermut nalunaarusiaq saqqummersimmagu.

Kalaallit Nunaannit oqaluttuarineqartoq taanna tupinnartut ilagaat. Kisianni aamma sakkutuut timmisartortartut ufo-nik takusaqartarsimanermik nalunaarusiaanni oqaluttuarineqartut amerlasuut qungujuutigiinnaraanni pitsaanerussaaq.

Nalunaarutigineqartut 15.000-it

Sakkutuut timmisartortartut ukiuni kingullerni 50-ini ufo-nik takunnissimasunik 15.000-inik nalunaaruteqartoqarsimagaluartoq taamaattoq agent Mulder-eqanngilaq aamma Scully-qanngilaq 'X-Files'-imeersunik nassuiaatigineqartunik paasiniaasussanik.

Ufo-nut tunngasut toqqorneqartarput inuiaqatigiinnik ulorianartorsiortitsinngikkaangata.

- Sakkutuut timmisartortartut suliassaat salliutinneqartariaqarput. Tassa Danmarkip illersornissaa, aamma ufo-t ilisimaneqartutut ulorianartorsiortitsisanngillat. Taamaanngikkaangata pisut eqqumiiginarsinnaasut kisiisa nalunaarusiarineqartarput, kisianni misissoqqinneq ajorpagu, Thomas Pedersen oqarpoq nassuiaatigalugulu ullumikkut paasissutissat aalajangersimasut Skandinavisk Ufo Centerimut nassiussorneqartartut, taamatut noqqaavigineqarsimagaangamik.

Powered by Labrador CMS