Nuuk Friskole 8. klassemik pilersitsiniarpoq
Nuuk Internationale Friskolep, NIF-ip atuartunut avataaneersunut aappaagu ukiumi atuarfiusussami 8. klaaseqalernissaq neqeroorutigaa.
Taamatut aalajangertoqarpoq »friskole siunissami nunanit tamanit piumasaqaatinut annertusiartuinnartunut piareersarniarlugu«, tusagassiorfinnut nalunaarummi allassimavoq.
Ukioq atuarfiusussaq 2009/2010 NIF-imi klassetrinimik nutaamik pilersaarusiorfioreerpoq, atuaqatigiit angajulliit klassetrinimi ataatsimik qaffatsillugit. Imaappoq atuarfimmi maannakkut 6. klasseusut aappaagu 7. klassenngortillugit. Kisianni tassa saniatigut aamma 8. klasseqalissaaq, atuarfiup pisortaa Nina Stilling ilisimatitsivoq.
– Misigisimavugut suli annertunerusumik alloriaqqissinnaalerluta, taamaattumillu atuartunik nutaavinnik avataaneersunik 8. klasseqaleernissaq pilersipparput. Taamaaliornikkut aamma nunarsuarmioqatitta qanilligaluttuinnartup internationalemik atuarfeqarnermut naatsorsuutigisai annertuut sukkanerusumik ilalersinnaalissavarput, Nina Stilling oqarpoq.
Atualernissamut allatsinnissamut piffissaliussaq kingullerpaaq tassaavoq 2009-mi marsip 13-iat, taamanikkussamut NIF-ip 2009/2010-mi 8 klassemik pilersitsinissaq pisariaqartinneqassanersoq naliliiffigissavaa.