Taartaagallartartunut aningaasat atorneqartartut isumaqatigiinniarnermi sakkuginiarneqarput
Peqqinnissaqarfimmi atorfillit namminersornerusut piumaffiginiarpaat taartaagallartartut akisoqisut taamaateqqullugit.
Aningaasat millionit koruunerpassuit taartaagallartussanut Danmarkimit pissarsisarnermut atorneqartartut aalajangersimasumik atorfillit aningaasarsiamikkut qaffanneqarnissaannut atorneqarlik.
Taamatut nipilimmik peqqissaasut kattuffiat PK aamma Peqqinnissaqarfimmi Sulisut Kattuffiat PPK namminersornerusunik upernaaq manna nutaamik isumaqatigiinniarnissaq sioqqullugu. Atorfilinnut tunngavissat erseqqissut imaapput: Aningaasat taakku atorlugit peqqinnissaqarfik pitsaanerusoq. Aningaasarsiat qaffallugit, taamaaliornikkut sulisussarsiortarneq sulisoriinnarneqarnissaallu ajornannginnerulissammata. Aamma namminersornerusut namminersortumut taartaagallartussarsiortarfimmut pissarsiuussinermini aningaasarsiaqartartussamut akiliuteqassaassagaluarpoq.
Isumaqatiginninniarnerit aallartinnginneranni namminersornerusut isumaqatigiinniartartuisa pisortaat, Palle Frederiksen, nalunaarpoq sulisartut inuiaqatigiinnik tapersersueqataasariaqartut akueralugulu maannakkut akissaqartoqanngimmat aningaasarsiat qaffarujussuarnissaannut.
Ilutigalugu namminersornerusut nassuerutigaat peqqinnissaqarfimmi atorfinittussanik pissarsisarneq ajornartuusoq. Taamaattumik illuatungeriit tamarmik isumassarsioqqissaartariaqarput aaqqissutissarsiornissamut isumaqatiginninniarnermut atatillugu.
Peqqinnissaqarfimmi atorfillit kattuffianni siulittaasup Karin Hollerip nuannaarutiginerarpaa namminersornerusut nutaanik eqqarsaatersuuteqartalersimanerat. Kisianni aamma mianersoqqussutigaa upernaamut isumaqatigiinniarnissani illuatungeriit aningaasarsiatigut qaffannissaq avaqqussinnaanngikkaat.
- Sianiinneruvoq eqqarsassagaanni isumaqatigiinniarnermi aningaasarsiat pingaaruteqanngitsut. Tamanna takusarparput, soorlu peqqissaasoq Kalaallit Nunaanni atorfinissanerluni aalajangiiffissagaangagu. Namminersornerusuni atorfinitsinneqarluni imaluunniit taartaagallartussarsiorfik aqqutigalugu allaanerulluinnartunik aningaasarsiaqartinneqarluni, Karin Holler oqarpoq.