Kalaallit Nunaannut amerlanerusut takornariarnissaat kissaatigineqarpoq
Qallunaat angalatitsiviutaat Profil Rejser oqartussaassappat taava 2009 ukioq tassaassaaq qalunaat amerlanerusut Kalaallit Nunaat sulingiffeqarnerminni angalavissaat.
Tassani Kalaallit Nunaannut angalanissamut apeqqutilliisartut amerlinerat tusaaniarneqarsimavoq kiisalu qinigassat amerlisinneqarsimallutik, zoommagazine.dk taamak allappoq.
– Annertujartuinnartumik malugisimavarput pisisartutta Kalaallit Nunaat pillugu apeqquteqartarnerat. Taamaattumik ilitsivigut amerlivagut angalavissallu nutaat pissanganartut neqeroorutigilerlutigit, pisortaaneq Jahn Schapiro, Profil Rejser, oqaluttuarpoq.
Ilitsiviit amerlissutaasut direktørip oqaluuserisaa, tassaapput pilerisaarutit Kalaallit Nunaannut tunngasut nutaarluinnaat, taakku siusinnerusumut sanilliullugu qalunaanit avannamut angalanissamik isumassarsititsiniartussat. Pilerisaarutini takuneqarsinnaapput angalanermi aqqutit nuannarineqartut soorlu assersuutigalugu umiarsuarmut ilaalluni angalanerit, ilisimasassarsiornerit kiisalu pinngortitami angalaneq.
Nutaartaa tassaavoq angalanernut akigitinneqartut assigiinngitsut amerlisimanerat. Nutaarsiassaq alla tassaavoq, Arctic Umiaq Linep sinersortaataanut ilaalluni angalanerup annertusineqarsimanera, taamaalilluni ulloq ataasingajak Nuummi uninngasoqarsinnaalluni.
– Nunarsuaq tamakkerlugu pisut tunngavigalugit angalatitsisarnivut iluarsaassimavagut, taamaalillutik ilaqutariit amerlanerusut angalanissamut missingersuutaannut naleqqqunnerulerput. Uagut isumaqarpugut tamanna iluartuusoq. Nunarsuaq tamakkerlugu aningaasarsiornikkut ajornartorsiorneq pissutigiinnarlugu, taava qalunaat aamma suli sulinngiffeqarnerminni angalanissaminnut akissaqartariaqarput - aaamma Kalaallit Nunaaliarnissaminnut, Jahn Schapiro zoommagazine.dk-mut oqarpoq.