Naja P: Sammisaqarfiit marlunnut avillugit
Ilaqutariinnut Peqqissutsimullu Naalakkersuisoq isumaqarpoq naalakkersuisoqarfimmi marlunnut avinneqarnera iluaqutissartaqartoq. Enoksen itigartitsivoq.
Sammisaqarfiit marluk, Ilaqutariit Peqqissuserlu, ingerlanniassallugit ajornakusoorsinnaavoq, AG naapertorlugu taamatut nassuerpoq naalakkersuisoq akisussaasoq Naja Petersen, Atassut. Taamatut oqaaseqarpoq piffissami kingullermi meeqqanik kaattunik Dronning Ingridillu Napparsimmavissuani ajornartorsiortoqarneranik oqallinnermut atatillugu.
– Assersuutigalugu naalakkersuisoqarfimmi ataatsimi maannakkutut annertuunik marlunnik ajornartorsiuteqartoqaraangat tamatumuunakkut sulineq kinguarsarneqarsinnaavoq. Taamaattumik isumaqarpunga iluaqutissartaqarsinnaasoq immikkoortoqarfiit naalakkersuisoqarfinnut marlunnut avinnerat, Naja Petersen aviisimut oqarpoq.
Tamannali peqatigalugu oqarpoq sammisaqarfiit marluk ataatsimoortinnerat aamma iluaqutissartaqartoq, tassa taakkua marluullutik inunnut tunngassuteqarmata taamaattumillu atorfillit qanimut suleqatigiissinnaallutik.
Naalakkersuisut siulittaasuata Hans Enoksenip, Siumut, naalakkersuisoqarfiup marlunnut avinneqarnissaa itigartippaa.
– Tamanna naalakkersuisut nutaat inatsisartunut qinersinerup kingorna (kingusinnerpaamik ukioq manna novemberimi, aaqqiss.) aalajangerumaarpaat. Qinersinissaq sioqqullugu allannguinissanik pilersaaruteqanngilanga, Hans Enoksen AG-mut oqarpoq.
Naja Petersenip naalakkersuisutut kingoraagaa, Aqqalu Abelsen, taamanikkut Atassut, maanna Siumut) aamma isumaqarsimavoq ilaqutariit peqqissuserlu ataatsimoortillugit annertoorujussuusut.
– Sammisaqarfiit annertoorujussuupput, taamaasillunilu pikkorissunik sulisoqarnissaq, ulluinnarni ikiuussinnaasunik, isumalluutaasorujussuuvoq. Inuup ataasiinnaap sammisaqarfinni angisoorsuarni marlunni immikkoortukujuit tamaasa malinnaaffigisinnaanngilai, Aqqalu Abelsen Sermitsiamut oqarpoq, siorna novemberimi naalakkersuisutut tunuarnerminut atatillugu.