Pædofilit sukannernerusumik pineqaatissinneqassapput
Pædofilit pineqartillugit Illuatungiliuttut pinerlunnermut inatsisit killiliussaasa sukannernerulersinnissaat tapersersorpaat.
Demokraatit Inuit Ataqatigiillu malissagaanni ukiukitsunik atoqateqarsimagaanni tamanna ukiut 15-it tikillugit inissiisarfimmiittussanngortitaanermik kinguneqartariqarpoq. Taamak AG aviisi allappoq.
– Kinguleruuppugut. Pinerlunnerni sakkortuuni soorlu pinngitsaaliilluni atoqatiginninnerini pædofilinullu tunngatillugu pineqaatissiisarnerit sakkukillappaaqaat, Demokraatit siulittaasuat Jens B. Frederikseni politiitut ilinniarsimasoq oqarpoq.
IAp aamma pineqaatissiisarneq sukannernerulersinniarpaa pillaanissamullu sinaakkusiussat eqqunneqarnissaat piumasaralugu.
– Pillaanermut killigititassat atuutilersillugillu pineqaatissiissutit qaffattariaqarpagut. Misissuinerit suli amerlanerusut utaqqisinnaanngilagut, AG naapertorlugu IA-p oqaaseqartartua Olga P. Berthelsen taamak oqarpoq.
Siumut akerlianik isumaqarpoq, pineqaatissiinerit sakkortunerit kissaatigisatut sunniuteqassanersut paasiniarlugu misissuinissaq pisariaqartoq. Taamak Otto Jeremiassen illuatungiliuttut oqaaseqaataannut akissuteqarluni AG-mut oqarpoq. Illuatungiliuttut oqaaseqaataat angutip 64-inik ukiullip pædofilip ukiuni marlunni pineqaatissinneqarneranut tunngatillugu saqqummiunneqarput.