Air Greenland-aktiat qimerloorneqarput
Naalakkersuisut isummerfiniarpaat SAS-ip Air Greenlandimi aktiaataasa pisiarinerat niuerluarnerussanersoq .
Piffissami qaninnerusumi naatsorsuutigineqarpoq Naalakkersuisut skandinaviamiut timmisartortitseqatigiiffiata SAS-ip Air Greenlandimi aktiaataasa millionilinnik naleqartut namminersornerusunit pisiarineqassanersut.
Kalaallit timmisartortitseqatigiivini aktiaatit 37,5 procentii SAS-imit maannakkut pigineqarput. Sipaarniuteqarnermut annertuumut atatillugu SAS-ip aktiaatiminik pisisussarsiornini erseqqissaatigeqqippaa.
- Timmisartortitseqatigiinnit nalunaarutit kingulliit tunngavigalugit Naalakkersuisut apeqqut tamanna tunngaviusumik isummerfigissavaat. Akuersisoqassappat taava namminersornerusut aamma SAS-ip akornanni oqaloqatiginneq aallartissaaq SAS-ip aktiaataasa nalilernissaat, pisinissamut neqeroorut il.il. pillugit, taama ilisimatitsivoq allaffimmi pisortaq Rasmus Pedersen Naalakkersuisut Siulittaasuata Naalakkersuisoqarfianeersoq.
Inatsisartut 2009-mut aningaasanut inatsit akuersissutigaat 306,2 millioner koruuninik amigartooruteqartoq. Aktianik pisinissaq tamatuma ajornarnerulersissavaa.