Uranimut akerliusut illuatungilerneqarput
Narsami innuttaasut 250-it pallillugit aatsitassanik piiaanissamut uranimillu saniatigut qaqitatut piiaanissaq tapersersorpaat.
Narsami Kuannersuarni aatsitassanik allanik piiaanermi uranip saniatigut piiarneqarsinnaaneranut Narsarmiut akerliusuinnaaqqajanngillat. Tamanna atsiortitsinerup naalakersuisunut ilaasortamut Kim Kielsenimut pingasunngormat unnukkut innuttaasut ataatsimiisinneqarneranni tunniunneqartup takutippaa.
Ataatsimiinnissaq sioqqullugu innuttaasut 219-it "Kuannersuarmi aatsitassanik piiaanissaq tapersersorparput"-mut atsiorsimapput. Ataatsimiinnerup naammassinerani innuttaasut 245-t atsiorsimasut Kommune Kujallermi immikkoortortaqarfimmi pisortaq Steffen Rosing Berthelsen sermitsiaq.gl-imut ilisimatitsivoq.
Atsiortitsinerit ullup unnuallu ingerlanerani ingerlanneqarput, suliniummik aallartitsisoq Jan Hansen Narsaq Automeersoq oqaluttuarpoq. Atsiornernik katersuinikkut kissaatigaa uranimik saniatigooralugu piiaanissaq pillugu eqqarsaatitigut Narsami akerliusuinnaanngitsuunerisa takutinnissaa. Taamatut peqatigiiffiup »Narsami urani naaggaarpara«-p pilersinneqarneratigut isumaqarnarsisinnaagaluarami.
Piiaanissamut tapersersuisut isumaqarput Kuannersuarni aatsitassanik piiaaffiliornissaq akuerineqassappat Narsami suliffinnik amerlanerusunik pilersitsiviussasoq. Arlaannik pisoqartariaqarpoq, taamaanngippat illoqarfik illoqarfikuinnanngorsinnaavoq, Jan Hansen oqarpoq.
– Fabrikki ingerlanerluppoq, inissiat inuttaqanngitsorpassuupput. Illoqarfikuinnanngoratarsinnaavugut, Jan Hansen oqarpoq.
Atsiornernik katersinermi allagartaliussaq imaappoq, takornariartitsinermut pisortaq Ib Laursen Narsami Inuussutissarsiornermut ataatsimiittartoqatigiinni ilaasortaasoq naapertorlugu:
Aap, Kalaallit Nunaata Kujataani aatsitassarsiorneq tapersersorpara.
Naagga, urani tapersersunngilara, (kisianni) minnerpaaffimmik killiinissaq pisariaqarpoq, Kalaallit Nunaanni qaqqat tamarluinnangajammik uranitaqarmata, killissarititaasoq EU USA-lluunniit killigititaata assinga.
Narsami aatsitassanik piiaaffimmik peqalissanngikkutta illoqarfik navianartorsiussaaq, Narsami maannakkut inissiat 70-it missaanniittut inuerussimasuulereerput.
Narsaq suliffissaqartitsinissarlu pillugit aatsitassanik piiaaffik tapersersorpara.
Aatsitassanik piiaaffimmut Aap.