Suliunnaartariaqarpoq
Gerhardt Kreutzmann kilisaammi maskinmesteriusimagaluarluni siffissamigutpilattartinnissaminut utaqqinini sivisungaarmat suliffinitaamaatittariaqarsimavaa.
Gerhardt Kreutzmann 55-inik ukioqartoq maskinistitut ilinniarsimasuuvoq inuunermilu annersaani kilisaammi maskinmesteriusimalluni. Ukiut arfineq pingasut siornatigut siffissamigut anniartalersimavoq, ukiullu arfinillit siornatigulli siffialunnera peqqinnissaqarfimmi ilisimaneqalersimavoq.
– Anniartaleraluttuinnarpunga. Ukiut tallimat siornatigut, tassa siffissama illuata nutaamik taarserneqarnissaa ukiumik ataatsimik sioqqullugu maskinmesteritut suliunnaartariaqalerpunga, Gerhardt Kreutzmann, ullumikkut Maniitsumi eqqartuussisuusoq oqaluttuarpoq.
Gerhardt Kreutzmann ukiut sisamat siornatigut suliaritissimavoq, siffissamilu illua taarsertissimallugu. Siffiai illuttut Danmarkimi taarserneqartussaasimagaluarput, taamatulli pisoqarsimanngilaq. Nuummi suliaritissimavoq, taamanikkullu neriorsorsimagaluarpaat ukiup ataatsip ingerlanerani illua aamma taarserneqarumaartoq.
– Suli suliaritinnissannut utaqqivunga. Ukiut sisamat taakku ingerlanerini utaqqisutut allatsissimanikuuvunga, marloriarlungalu misissortittarnikuullunga, tamatigullu oqarfigisarpaannga ajortorujussuusoq piaartumik suliarineqartariaqartunga, Gerhardt Kreutzmann oqarpoq.
Gerhardt Kreutzmann-imik allaaserisaq Sermitsiami nutaami saqqummersumi atuaruk.