Politikerit DIH ikiorniarpaat
Aningaasanut ataatsimiititaliami ilaasortat Dronning Ingridip Napparsimmavissuanut 20 millioner koruuninik immikkut qinnuteqaat ilalerniarpaat.
Ukiup ingerlarngani taamak siusitsigisukkut napparsimmavissuup immikkut aningaasaliiffigineqarnissaanut aningaasanut ataatsimiititaliami ilaasortat imaasiallaannaq akuersinianngillat. Aammattaarli ajornarsaarniaratik.
- Qinnuteqaammilli takoqqaarusuppugut isumminnginnitsinni, tamarmik isumaqatigiillutik oqarput.
Taamaakkaluartoq aningaasanut ataatsimiititaliami ilaasortat akuersaarpasinnerupput. Demokraatit ataatsimiititaliami sinniisuat Jens B. Frederiksen toqqaannartumik oqarpoq peqqissaasut akissarsiaat qaffanneqartariaqartut.
- Nunanik allanik taamatut sakkortutigisumik unammillertilluta akissarsianik minnerpaamik angeqataannik neqerooruteqartariaqarpugut, Jens B. Frederiksen oqarpoq.
Peqqissaasulli akissarsiakitsuunngillat isumaqatigiinniarnernilu kingullerni sulisartoqatigiit allat qaangerpaat akissarsiaallu 11 procentimik qaffallutik. Qanoq isillusi illersorsinnaavisiuk sulisartoqatigiit aalajangersimasut taamatut salliutinnissaat?
- Sulisartoqatigiit allat akuersaartariaqarpaat peqqissaasut, ilami aamma perorsaasut, immikkut pineqartariaqarnerat. Inuiaqatigiinni ingerlatat taakkua marluk pingaaruteqartorujussuupput, taartaasunik taarserneqartuaannarsinnaanngitsut. Akissaa akilertariaqarparput tigummiinnarniarutsigit, Jens B. Frederiksen oqarpoq.
Otto Jeremiassenip Siumumeersup Demokraatit isumaqatigai.
- Pissutsit taamaatsillugit toqqagassaqarpallaanngilagut. Innuttaasunik sullissineq maannakkorpiaq pitsaavallaanngilaq, tamannalu akuersaarsinnaanngilara. Immikkut aningaasaliissuteqarnissaq illersorsinnaavara, isummertinnangali qinnuteqaat takoqqaarusuppara, Otto Jeremiassen oqarpoq.
Ataatsimiititaliap siulittaasua Augusta Salling, Atassut, aamma Agathe Fontain, Inuit Ataqatigiit, tunuarsimaarnerupput.
- Immikkut aningaasaliissutit eqqarsaatigalugit siullerpaamik missingersuutinut inatsit malissavaræut, tamatigulli silatusaarneruvoq piffissaalluartillugu saaffiginninnissaq, aningaasanik amigaateqangajalernermi, Agathe Fontain oqarpoq.
Allaaserisat allarpassuit Sermitsiami atuakkit:
DIH-mi ajornartoorneq pillugu ataatsimiinnerit aappaat
Taartaasartunut immikkut 20 milliuunit
Inuit inuunerannik akeqarsinnaavoq
DIH-mi ajorluinnartut arlaat
K 3 marsip 31-anni sulisuerutissaaq
Suleqatigiissitaq siunnersuuteqassaaq
Filippinerit akikinnerunngillat