Mingutsitsineq Kinameerpoq
Kalaallit Nunaat Savalimmiullu nunarsuarmi avatangiisinut toqunartut ulorianarnersaasa ilaannit - tassa kviksølvimit - mingutsitsinermit sakkortoorujussuarmit eqqorneqarput. Taamak Berlingske.dk allappoq.
»Made in China« naalagaaffeqatigiiffimmut kviksølvimik mingutsitsinermut aallaaviusoq pillugu qulequtaq taamak allassimavoq. Danskit ilisimatuui isumaqarput Kinami aamarsuarnik atuinerup annertusiartornera Issittumi kviksølvimik mingutsitsinerup annertusiartuinnarneranut nassuiaatissanut ilaasoq. Taamak Berlingske.dk ullumi allappoq.
Assersuutissaavoq nanoq, taanna timimigut kviksølvimik annertugigaluttuinnartumik tigooraavoq. Nannup meqquinik 1892-imiit 2001-ip tungaanut misissuinerit paasinarsisippaat nannut kviksølvimik tigooraanerat ukiut ingerlaneranni annertusiartorsimasoq, kisitsisillu takutippaat nannut kviksølvimik tigooraanerat ullumikkut 14-eriaammik annertunerusoq. Oqartussaasut kingullerpaatigut niisarnarnik annertuumik mingutsinneqarsimasunik nerisaqarnissamut mianersoqqussuteqarput.
Misissuinermi aqutsisuuvoq Danmarks Miljøundersøgelser-meersoq Rune Dietz, taassuma Kalaallit Nunaanni uumasut miluumasut mingutsinneqarnerat pillugu doktorinngorniutigalugu allaaserisani naammasseqqammerpaa.