Dash-7 nunamiiginnassaaq
Dash-7 suli timmisinnaanngikkallarpoq. Ataasinngorneq 12. aamma marlunngorneq 13. januar Air Greenlandip Nuummut Nuummiillu timmisartuussassai timmisartuussinissamut pilersaarutaasut allanngortinneqarnerannit eqqorneqassapput.
Dash-7 sapaatit akunnerata aallartilaarnerani truckimit aporneqarpoq, iluarsartuunneralu naatsorsuutigisamit sivisunerussaaq. Aamma ataasinngornermi marlunngornermilu timmisinnaassanngilaq, kisianni Air Greenlandip timmisartuussinissat allanngortiternerisigut pilersaarutaasutut ullut taakku apuuffissaminnut timmisartuunneqarsinnaasussanngortippai, kisianni amerlasoorpassuit nalunaaqutaq piffissaasup allanngortinneqarneratigut timmisartuunneqassallutik.
Ataasinngornermi timmisartuussinissat GL546 Nuuk-Kangerlussuaq kiisalu GL212 Nuuk-Maniitsoq-Sisimiut-Kangerlussuaq eqqorneqassapput.
Marlunngornermi timmisartuussinissaq ataaseq eqqorneqassaaq, tassa GL546 Nuuk-Kangerlussuaq, nalinginnaasumik nal. 09.20 aallartussaq. Allanngortiterinermi siusinnerusukkut aallartussanngorpoq, tassa nal. 07.00 Nuummiit aallassalluni.
Air Greenlandip sapinngisamik ilaasussat kalerrinniarpai, kisianni taakku aamma Nuummi Air Greenlandip angallannermut allaffianut saaffiginneqquneqarput paasiniarlugu timmisartuussinissanut sorlernut ilaasussanngorsimanersut. Saaffiginniffissaq normoqarpoq 34 31 77.