Nunat allat piniartunut aamma ikiuuttariaqarput
Ilulissat silaannaap allanngoriartornerinut igalaatullusooq atuussimavoq. Nunat allamiut maanna aamma Kalaallit Nunaanni piniartunut aalisartunullu silaannaap allanngoriartornerinit eqqorneqartunut ikiuunnissaannut piffissanngorpoq, taamak Qaasuitsup Kommuniani borgmesteri Jess Svane sikumik ikaartarfialiap uleerneqarneranut atatillugu oqarpoq.
Ilulissani sikumik ikaartarfiliaq marlunngornermi januaarip 13-iani - ullormi seqernup nueqqaarfiani - uleerneqarpoq. Kisianni seqineq ukioq manna nuiaarneruniarsimagami Ilulissanut januaarip 11-iani nuereersimavoq.
Sikumik ikaartarfialiap uleerneqarneranut atatillugu seqineq uternerani tikilluaqquneqarpoq. Ikaartarfik norgemiumit Vebjørn Sandimit illoqarfiup avatinnguani suliarineqarsimavoq. Sikumik ikartarfiliaq silaannaap allanngoriartorneranut ersiutitut sananeqarsimavoq, taassumalu assinga Qalasersuarmi Kujallermi, New Yorkimi Ilulissanilu sananeqarsimavoq. Aamma silaannaap allanngoriartornera pillugu ataasimeersuarnissamut atatillugu Københavnimi sananeqassaaq.
Sikumik ikaartarfiliaq Jess Svanemit uleerneqarpoq, taanna aamma silaannaap allanngoriartorneranut atasumik oqaaseqarpoq.
– Ministerit pisortallu assigiinngitsut Ilulissaniissimapput, sermeq iigartartoq takusarsimallugu, taakkuli aallaqqereerput. Nunat allamiut maanna aamma piniartunut aalisartunullu nammineq pisuussutiginngisaminnik inuup pilersitaanik silaannaap allanngoriartorneranit eqqorneqartunut aningaasatigut ikiuuttariaqalerput. Nunanut assigiinngitsunut silaannaap allanngoriartorneranik eqqorneqartunut ajornaateqanngitsumik aningaasanik ikiorsiisoqartarpoq. Kalaallit Nunaannut tunngatillugu aamma taamaaliortoqartariaqarpoq, Jess Svane sermitsiaq.gl-imut oqarpoq.
Ilulissat kangerluat maannakkorpiaq qanoq innersoq Sermitsiap webcam-iani takusinnaavat uani.