Qaqortumi immap naqqatigut kabeli puigugaq
Kabelerujussuup Greenland Connectip immap naqqanut ilioqqarnerani arlaleriarluni nalunaarasuartaatitigut kabeltitoqaq naammattoorneqartarsimavoq, suminngaanneernersoq kimilluunniit eqqaamaneqanngitsoq.
TELE-p immap naqqatigut kabeli sakkortooq ikkussuleruttorpaa, New Foundlandimiit nunatta kangiata sineriaa atuarlugu Islandimut isorartussusilik.
Fibernettit issusuut immap naqqanut ilioqqarneranni, umiarsuup kabelimik ilioqqaasup Ile de Sein-ip kabelitoqaq arlaleriarluni naammattoortarsimavaa. Marloriarluni kabeli Qaqortup silataani kangerlummi nivaatarsuarmik qaqinneqartarsimavoq, taamatut allappoq berlingske.dk.
Telep maanna nalunaarasuartaatitigut kabelitoqqamut paasissutissat ujartorpai, kabeli taanna "kabelinik immikkut ilisimasalimmit" nalilerneqarsimalluni 1930-ikkut qiteqqunneranni sananeqarsimassasoq.
Ilimagineqarpoq kabeli immaqa Qaqortup Kangerluanut iliorarneqarsimasoq amerikarmiunit, Narsarsuarmi mittarfiup, 1941-mi pilersinneqarsimasup, Blue West One-mik taaguuteqartutut ilisimaneqartup, illersornissaanut kalerrisaarutip ilaatut. Mittarfik sorsunnersuup kingulliup nalaani Kalaallit Nunaanni sakkutooqarfiusimavoq pingaarutilik.
Narsarsuullu Katersugaasiviata kabeli ilisimasaqarfiginngilaa.
Kabeli pillugu paasissutissanik ilisimannittoqaruni Tele-gl-imut paasissutissiinermut attaveqartoqarsinnaavoq.