Ruth H. isorinninnermut akivoq
- Inatsisartunut Siulittaasutut inatsisinit malittarisassanillu malinnittussaavunga, Ruth Heilmann oqarpoq. Ruth isumaqarpoq isornartorsiuineq ilisimaatsuunermit aallaaveqartoq, ilaatigut tusagassiorfiit paasisimasaqarnerusariaqarsimagaluarlutik.
Ruth Heilmann taasinerni peqquserluuteqartarsimanerit pillugit suliami Siulittaasoqarfiup isummerneri pillugit piffissami kingullerpaami isorineqartualersimasoq ukiortaami oqalugiaammini akivoq:
...Ukiup nutaap ilarujussua ilanngullugu sammineqartussaavoq. Siulittaasoqarfik tamarmiusoq suliaq pineqartoq pillugu inaarutaasumik oqaaseqaatiminni 2008-imi decembarip 19-ianeersumi oqaatigisariaqartut oqaatigereerpaat. Ilanngukkusupparali Inatsisartut Siulittaasoqarfia inatsisinik malittarisassanillu aamma malinnittussaammat. Kina malittarisassanik unioqqutsitsinerit pillugit ajuallannermigut Inatsisartut Siulittaasoqarfianik inatsisinik atuuttunik unioqqutitseqqusisoq imminik inatsisaatsuliornissamut oqaaseqartartutut inissippoq. Oqallittut ilaannut ilisimaatsuuneq immaqa utoqqatsissutigineqarsinnaavoq, kisianni taakku tusagassiorfiit paasisimasaqarnerusimasariaqaraluarput... Ruth Heilmann allappoq.