Kalaallit Nunaanniit tappavani mamartorsuit
Nunatsinni suliffeqarfiit annersaasa ilaasa marluk suleqatigiinnerat Royal Greenlandip aamma Air Greenlandip annertusarneqassaaq, timmisartumilu Kalaallit Nunaata aamma Danmarkip akornanni ilaasut akulikinnerusumik aalisakkat qaleruallillu mamassuisiat tikkallu misigisalissavaat.
Raajat, kapisillit, saarullit, qalerallit aamma nerisassat nutaat Kalaallit Nunaanneersut angalasunit naammattoorneqartalissapput Atlantikorsuaq qulaakkiartornerani.
Februaarip aallaqqaataa 2009 aallarnerfigalugu Nanoq-klassemi nerisassat kissartut sisamaagaangata siuleqqiutit pingasut Royal Greenlandimi nioqqutissiat tunngavigalugit iganeqarsimasassapput, taamatuttaarlu issaaq akikinnermi siuleqqiutit sisamaagaangata pingasut aamma kissartut ataatsit taamakku tunngavigalugit sassaalliutigineqartassapput.
Nerisassiat Gate Gourmetimit suli iganeqartassapput, kisianni RG-mit tunisassiat annertunerusumik atorneqalissallutik.
- Pisisartutta pitsaanerpaamik misigisaqarnissaat kissaatigaarput, uagutsinnullu pissusissamissoorpoq tuniniaasartut nunatsinneersut atortaratsigit, taamaattumik nuannaarutigaarput tulluusimaarutigalugulu suleqatigiinnerup tamatuma annertusarnera, taamaaliornikkummi ilaasut Kalaallit Nunaanneersunik mamartunik misiliitinneqassapput, Air Greenlandimi pisortaaneq Michael Binzer oqarpoq.
Suliffeqarfissuarmi Royal Greenlandimi pisortaaneq Flemming Knudsen aamma suleqatigiinnerup annertusineranik nuannaarutiginnippoq.
- Suleqatigiinnerup tamatuma qangali Royal Greenlandip kissaatigisimasaa piviusunngortippaa. Air Greenland aqqutigalugu Royal Greenlandimi tunisassiagut ilisaritissinnaagutsigit tamanna timmisartuni nerisassanik nerisassiortarnut uagutsinnut nittarsaassinissamut periarfissatsialaavoq. Air Greenland ilisimaneqarpoq sullissinera pitsaasuusoq, taannalu suleqatigalutigut taamatut iliorsinnaagatta asseqanngilaq, Flemming Knudsen oqarpoq, taassumalu qilanaarivaa suleqatigiinnerup RG-ip tunisassiaanik nalunnginninnerulernissamik kinguneqarnissaa tamatumuunakkullu aamma Nunatsinnut tikeraat aamma suli pitsaanerusumik misigisaqartinneqassammata.