Siunnersuinermi assistentit nutaat
Siunnersuinermi assistentit nutaat 16-it ukioq ilivitsoq ilinniagaqaqqinnertik isumaginninnerup iluani naammassereerlugu 10. januar 2009-mi Kangerlussuarmi allagartartaarput.
Siunnersuinermi assistentitut ilinniagaqaqqinneq pisortat ingerlatsiviini allaffimmiutut ilinniarsimasunut ulluinnarnili isumaginninnermik suliaqartunut sammitinneqarpoq. Ilinniarnerup siunertaaraa isumaginninnermik suliaqarnissamut ilisimatusarnissaq kiisalu siunnersuinermi assistentitut piginnaanngorsarneqarnissaq.
Ilinniartitaaneq modulikkaartumik ingerlanneqartartoq atuagarsornermik, sungiusarnermik nammineerlunilu ilisimatusarnermik imaqarpoq.
Siunnersuinermi assistentinngorlaat tamarmik kommunini isumaginninnermik ingerlatsivinni atorfeqarput.
Maanna ilisimasaqarnerulersimallutik piginnaasaqarnerulersimallutillu atorfimminnut utertussanngorput.
Siunnersuinermi assistentitut naammassisut holdit aapparaat.
Ingerlatsinermik Isumaginninnermillu Instituttip, Ilimmarfik-miittup, aammalu Ilaqutariinnermut Peqqissutsimullu Naalakkersuisoqarfiup suleqatigiillutik ilinniagaqaqqinneq ingerlataraat.