Københavnermioq Qaasuitsup Kommuniani pisortanngussaaq
Københavns Kommunemi ingerlatsivimmi pisortaq Qaasuitsup Kommuniani pisortanngussaaq.
Sigvard Hvidsteen, 57-inik ukiulik kommuunerujussuarmi nutaami Qaasuitsup Kommuniani pisortassatut toqqarneqarpoq.
Sigvard Hvidsteenip anaana kalaaliuvoq, Kalaallit Nunaannilu amerlasuunik qanigisaminik ilaqutaqarpoq. 1980-ikkut aallartinneranni ukiuni arlalialunni Nanortaliup Kommuniani aningaasaqarnermut pisortaavoq, tamatumalu kingorna arlaleriarluni tikeraartarsimalluni.
Hvidsteen kukkunersiuisutut ilinniagaqartuuvoq tamatumalu kingorna Danmarks Forvaltningshøjskolemi ilinniaqqinnermigut diplomøkonominngorluni. Assigiinngitsunik suliffeqarsimanini soorlu makkunani Arbejdsmarkedsstyrelsen, Kræftens Bekæmpelse, Mødrehjælpen, Socialforskningsinstituttet aamma Københavns Kommune pissutigalugu kommunerujussuarmi suliassarpassuit ataatsimoortinnissaannut tunngavissaqarluarpoq.
– Assorsuaq Kalaallit Nunaannut uteqqinnissannut qilanaarpunga, Sigvard Hvidsteen Sermitsiamut oqarpoq. Københavns Kommunemi B&U - Meeqqanut inuusuttunullu sullissinermi - pisortatut atorfeqarninni ukiuni kingullerni pingasuni Distrikt Indre By-mi annertuumik allanngortiterivunga, taamaattumik sungiusimavara suliffeqarfimmi allanngoriartortumi ineriartortitsinissaq. Taamatorluinnaq Qaasuitsup Kommunia maanna inissisimaqqavoq. Assut pissanganaræuni unammillernartuuvoq naaggaarsinnaasimanngisara, aammali ataqqisara. Uanga nammineq inuttut assigiinngissuseqarnissaq aamma periarfissaqartitsinissaq, qilanaaraa Kalaallit Nunaanni inuit assigiinngitsorpassuit suleqatiginissaat - kiisalu politikerit takorluugaasa piviusunngortinnissaat.