Kalaallit Nunaat Savalimmiunut ajugaavoq

NUTARTIGAQ Angutit assammik arsarlutik nunanut allanut unammisartui Savalimmiormiunut Tórshavnimi pingasunngormat unnukkut unammigamik ajugaaqqarput.

Unammisartut ajugaanertik nuannaarutigaat.

Nunanut allanut unammisartut ajugaapput 33 - 30 nikinnermi 14 - 19 inerneruvoq.

Kalaallit Nunaata unammisartui unamminerup immikkoortuata aappaani ilungersoramik iluatsitsipput.

Kalaallit unammisui arsarnerup immikkoortuani siullermi arsarluanngikkaluarput. Arsaq maangaannartinneqartarpoq ajuuteriartartullu savalimmiormiut måliniittuat assut qaangeruminaatsittarpaat. Nikinnermi Kalaallit Nunaat 14 - 19-imik kinguaqqavoq. Arsarluartarnerigaluallu soorlu takussaanngitsoq.

Nikinnerup kingorna unammisartut allanngorluinnarsimapput, arriitsumillu unammisartut unarminermut iseriartulerput. Illersuinermi ilungersortaqalerpoq, tamatumalu kingunerisaanik marloriarluni anisitsigallartoqarpoq; Jakob Larsen ataasiarluni aamma Rasmus Larsen ataasiarluni.

Milo Rosing ajuuppoq naligiilerpullu 22 - 22-mut. Unamminerullu immikkoortuata aappaani minutsit 16-init ingerlareersut Kalaallit Nunaat 25 - 23-mik siuarpoq. Taavalu 32 - 27-mik sioqqareerlutik Kalaallit Nunaat 33 - 30-imik ajugaavoq.

Ajuuttut tassaapput:

Minik Dahl Høegh 7

Andreas Lorentzen 6

Jakob Larsen aamma Milo Rosing tamarmik 5

Angutimmarik Kreutzmann aamma Danny Brandt tamarmik 3

Akutaaneq Kreutzmann aamma Rasmus Larsen tamarmik 2

Ataatsimoorluni ilungersoqatigiinneq

Unammereernerup kingorna tusagassiortunik katersortitsinermi sungiusaasup unamminerup innernera assut iluarisimaarpaa. Oqarneratuullu "Ataatsimoorluni ilungersoqatigiinnerup kingunerisaa".

- Arlaat arlaannut sanilliullugu saqqumilaartinnianngilara. Tamarmik nukarlersaminninngaannit misilittagaqarnerpaamut unamminerup immikkoortuata aappaani assorsuaq unammilluarput, sungiusaasoq oqarpoq.

Tusagassiortunik katersortitsinermi peqataavoq Rasmus Larsen. Nutaamik rekortiliisoq: 87.

- Nalunngilarput Savaliummiut nuna inuuniarfigissallugu sakkortoorujussuusoq, tamannalu unammisartut assut ilumooruppaat, unammisartoq oqarpoq.

Aperineqarami assammik arsartartut nunanut allanut unammisartuini qaqugu soraarninngussanersoq akivoq: Suli sapaatit akunneranut tallimariarlunga arfinileriarlungaluunniit sungiusartarlunga, qaffasissuseq manna attatiinnarsinnaagukkut, taava peqataassaanga.

Tórshavnimi unamminermut isiginnaarusunneq naatsorsuutigisamit taamak annertutiginngilaq. Tassa Savalimmiuni Assammik Arsartartut Kattuffiata neriuutigisimasaattut isiginnaartut 1.000-iunngillat.

Unamminerup aallartinnginnerani Savalimmiormiut amerlasuut sermitsiaq.gl-imit oqaloqatigisatta Kalaallit Nunaat ajugaassangatippaat. Aammalumi taamaapput kalaallit amerlasuut isiginnaariasimasut. Kalaallit arsarneranni pisariaqartitseruttorfiannilu tapersersuilluarnermikkut iluatsitsinerannut peqataalluarput.

Nunanut allanut unammisartut sisamanngorpat Danmarkimut aallassapput.

Powered by Labrador CMS