Qeqertarsuup Tunuanut umiarsuaq siulleq
Royal Arctic Linep sapaatit akunnerata naanerani Aasiaat, Ilulissat aamma Qasigiannguit tikinniarlugit misiliiniarpoq.
- Sila kiisalu sikut inissisimanerat piffissami matumanerpiaq iluaqutaasinnaasutut isikkoqarput, taamaattumik maannakkut toqqarparput angalanissamik taamatut misiliinissaq, RAL allappoq.
Arina Arctica arfininngorpat januaarip 24-ani misiliilluni Qeqertarsuup Tunuanut angalaniarpoq Aasiaat, Ilulissat aamma Qasigiannguit tikiniassallugit.
Arina Arcticap ilaatigut usigissavai nioqqutissat nalinginnaasut, pisattat nuunnermut atatillugu assartugassat kiisalu sodavandit. Qeqertarsuup Tunuaniit Arina Arcticap usigisassaatut salliutinneqartut tassaassapput raajat aamma qalerallit, taamaaliornikkut qerititsiveqarfiit imaarneqarniassammata, suliffissuillu tunisassiornertik ingerlatiinnarniassammassuk.
Royal Arctic Line A/S-ip angalanissamut pilersaarutaani pingaarnermi Qeqertarsuup Tunuanut angalanissanut pingasunut periarfissiisoqarpoq, ukioq manna umiarsuit pisortatigoortumik angalalernissaat sioqqullugu.